اسلام آباد ہائیکورٹ میں نئے رولز 2025 کی منظوری ایک بڑے قانونی اور آئینی تنازع کا سبب بن گئی ہے۔ جسٹس بابر ستار نے اس معاملے پر شدید اعتراض اٹھاتے ہوئے قائم مقام چیف جسٹس سرفراز ڈوگر سمیت تمام ہائیکورٹ ججز کو ایک تفصیلی خط لکھا ہے جس میں انہوں نے واضح طور پر کہا ہے کہ بغیر فل کورٹ میٹنگ کے اسلام آباد ہائیکورٹ رولز میں تبدیلی غیرقانونی اور آئینی خلاف ورزی ہے۔

خط کے مطابق، جسٹس بابر ستار نے اس بات پر زور دیا کہ آئین کے آرٹیکل 208 کے تحت صرف چیف جسٹس اور ہائیکورٹ کے تمام ججز مل کر رولز بنانے کے مجاز ہیں، اور یہ اختیار کسی اور کو تفویض نہیں کیا جا سکتا۔ انہوں نے لکھا کہ ان کے علم میں ایسی کوئی فل کورٹ میٹنگ نہیں آئی جس میں اسلام آباد ہائیکورٹ رولز 2011 کو منسوخ کیا گیا ہو یا اس پر بحث ہوئی ہو۔

جسٹس بابر ستار نے مزید کہا کہ جو اسلام آباد ہائیکورٹ رولز 2025 جاری کیے گئے ہیں وہ نہ صرف آئینی اتھارٹی سے محروم ہیں بلکہ ہائیکورٹ کی ساکھ کو بھی شدید نقصان پہنچا سکتے ہیں۔ انہوں نے متنبہ کیا کہ یہ اقدام نہ صرف ملازمین کے حقوق متاثر کر رہا ہے بلکہ ادارے کے لیے شرمندگی کا باعث بھی بنے گا۔

ان کا مؤقف تھا کہ لاہور ہائیکورٹ رولز، جنہیں اسلام آباد ہائیکورٹ نے اپنا ماڈل بنایا تھا، بھی آرٹیکل 208 کے تحت کسی فرد کو اختیارات منتقل کرنے کی اجازت نہیں دیتے۔ لہٰذا نئے رولز کو فوری طور پر واپس لے کر ان کی آئینی حیثیت کا ازسر نو جائزہ لیا جانا چاہیے۔

یہ معاملہ آئندہ دنوں میں اسلام آباد ہائیکورٹ کے اندر قانونی اور انتظامی سطح پر اہم پیش رفت کا باعث بن سکتا ہے، کیونکہ جج کے اعتراض نے ہائیکورٹ کی اندرونی شفافیت اور آئینی عملداری پر کئی سوالات اٹھا دیے ہیں۔

پاکستان اور چین کے درمیان ٹیکنالوجی کے تبادلے اور صنعتی مہارت کے فروغ کے لیے ایک اہم اور تاریخی 5 سالہ معاہدہ طے پا گیا ہے۔ یہ معاہدہ اسپیشل انویسٹمنٹ فسیلیٹیشن کونسل (ایس آئی ایف سی) کے تحت پاکستان انڈسٹریل سیونگ مشینز امپورٹرز اینڈ ڈیلرز ایسوسی ایشن اور چین کی گوانگ ڈونگ شو میکنگ مشینری ایسوسی ایشن کے درمیان ہوا۔ معاہدے کا بنیادی مقصد پاکستان کی صنعت، خاص طور پر جوتا سازی، چمڑے اور گارمنٹس کے شعبوں میں جدید چینی مشینری اور ٹیکنالوجی متعارف کرانا ہے تاکہ ملکی پیداوار، معیار، اور برآمدات میں نمایاں بہتری لائی جا سکے۔

یہ اقدام پاکستان کی برآمدی صنعت کے لیے ایک نئے دور کا آغاز سمجھا جا رہا ہے، جس سے روزگار کے ہزاروں نئے مواقع پیدا ہوں گے اور مقامی صنعتکاروں کو عالمی معیار پر ترقی کرنے کا موقع ملے گا۔

اس کے ساتھ ہی پاکستان اور چین کے درمیان جدید دفاعی ساز و سامان کی خریداری کا ایک اور اہم معاہدہ بھی طے پایا ہے۔ اس معاہدے کے تحت پاکستان، چین سے 40 عدد ففتھ جنریشن جے 35 اسٹیلتھ فائٹر طیارے، کے جے 500 اواکس طیارے، اور ایچ کیو 19 میزائل ڈیفنس سسٹم حاصل کرے گا۔ ان جدید ہتھیاروں سے پاکستان کا فضائی دفاع ناقابل تسخیر ہو جائے گا اور پاک فضائیہ کو خطے میں واضح برتری حاصل ہوگی۔

جے 35 طیارہ شنیانگ ایئرکرافٹ کارپوریشن کا تیار کردہ ہے اور اپنی جدید اسٹیلتھ صلاحیتوں کے باعث دشمن کے دفاعی نظام کو چکمہ دینے کی بھرپور صلاحیت رکھتا ہے۔ کے جے 500 اواکس طیارے کے ذریعے فضائی نگرانی مزید مؤثر بنائی جا سکے گی، جب کہ ایچ کیو 19 میزائل ڈیفنس سسٹم پاکستان کو بیلسٹک میزائل حملوں سے مؤثر انداز میں بچانے کی صلاحیت دے گا۔

یہ دونوں معاہدے پاکستان کے صنعتی اور دفاعی مستقبل کے لیے سنگ میل کی حیثیت رکھتے ہیں اور پاک چین دوستی کو عملی تعاون میں بدلنے کی نمایاں مثال ہیں۔