میانمار میں 7.7 شدت کے زلزلے نے تباہی مچادی، جس کے نتیجے میں درجنوں عمارتیں زمین بوس ہوگئیں۔ بڑی تعداد میں ہلاکتوں کا خدشہ ظاہر کیا جا رہا ہے۔ زلزلے کے جھٹکے تھائی لینڈ اور چین تک محسوس کیے گئے۔ میانمار کے وسطی حصے میں مقامی وقت کے مطابق 12:50 بجے 7.7 شدت کا زلزلہ محسوس ہوا، جس کے بعد 6.8 شدت کا ایک آفٹرشاک بھی آیا۔
امریکی جیولوجیکل سروے کے مطابق، زلزلے کا مرکز سگائنگ شہر سے 16 کلومیٹر شمال مغرب میں اور 10 کلومیٹر کی گہرائی پر تھا۔ بین الاقوامی میڈیا کے مطابق، زلزلے کے جھٹکے شمالی تھائی لینڈ تک محسوس کیے گئے، جہاں دارالحکومت بنکاک میں عمارتیں گر گئیں اور 43 افراد ملبے تلے دب گئے۔ بنکاک کی سڑکوں پر دراڑیں پڑ گئیں، جس کے بعد میٹرو اور ریل کی سروسز معطل کر دی گئیں، جبکہ چین کے صوبے یونان میں بھی زلزلے کے جھٹکے ریکارڈ کیے گئے۔

چین کے ارضیاتی مرکز نے یونان میں زلزلے کی شدت 7.9 بتائی ہے۔ خبر رساں ایجنسی ’رائٹرز‘ کے مطابق، طاقتور زلزلے کے بعد تھائی لینڈ کے دارالحکومت بنکاک میں افراتفری پھیل گئی، اور کئی عمارتیں منہدم ہوگئیں۔ بنکاک میں عینی شاہدین کا کہنا ہے کہ لوگ خوف و ہراس کے عالم میں سڑکوں پر نکل آئے، جن میں زیادہ تر ہوٹل کے مہمان تھے جو غسل خانے اور تیراکی کے ملبوسات میں تھے۔ میانمار کی جانب سے فوری طور پر نقصان کا تخمینہ لگانے کی کوششیں جاری ہیں۔

حکومت نے دہشتگردی کے خلاف ایک اہم قدم اٹھاتے ہوئے جعفر ایکسپریس کے حملہ آوروں کو دنیا کے سامنے بے نقاب کرنے کا فیصلہ کیا ہے۔ وزیراعظم شہباز شریف کی زیر صدارت ہونے والی ایک بڑی بیٹھک میں وفاقی اور صوبائی قیادت نے اس معاملے پر واضح اور دو ٹوک موقف اپنایا۔ اس اجلاس میں عسکری اور سول قیادت کے ساتھ ساتھ چاروں صوبوں، آزاد کشمیر اور گلگت بلتستان سے بھی نمائندے شریک ہوئے۔

اجلاس میں یہ طے پایا کہ جعفر ایکسپریس کے حملہ آوروں کو بے نقاب کرنے میں کوئی کسر نہیں چھوڑی جائے گی اور روایتی و ڈیجیٹل میڈیا پر ملک دشمن مہم کا مؤثر جواب دیا جائے گا۔

مزید یہ کہ قومی بیانیے اور ملک کی سلامتی کے خلاف کسی بھی قسم کے مواد کی روک تھام کے لیے بھی اقدامات کیے جائیں گے۔ نیشنل ایکشن پلان کے تحت قومی بیانیے کو مضبوط کرنے پر بھی اتفاق کیا گیا۔ قومی بیانیہ کمیٹی کو ہدایت کی گئی کہ وہ دہشت گردوں اور شرپسندوں کے خلاف مؤثر اور سرگرم بیانیہ تیار کرے۔ اس کے علاوہ، ملکی سلامتی اور ہم آہنگی کے لیے تمام صوبوں کے تعاون کی ضرورت پر بھی زور دیا گیا۔