پاکستان تحریک انصاف کی سوشل میڈیا ایکٹوسٹ فلک جاوید کے جسمانی ریمانڈ میں مزید چار دن کی توسیع کر دی گئی ہے۔ لاہور کی ضلع کچہری میں ریاست مخالف ٹویٹ اور ایک صوبائی وزیر کی نامناسب تصویر سوشل میڈیا پر اپلوڈ کرنے کے مقدمے کی سماعت ہوئی، جس میں جوڈیشل مجسٹریٹ نعیم وٹو نے جسمانی ریمانڈ بڑھانے کا حکم جاری کیا۔

دوران سماعت، این سی سی آئی اے نے عدالت سے مزید جسمانی ریمانڈ کی استدعا کی، جس کی پی ٹی آئی رہنما کے وکیل رانا عبدالمعروف نے شدید مخالفت کی۔ وکیل نے مؤقف اختیار کیا کہ ایف آئی آر جھوٹی بنیاد پر درج کی گئی ہے، فلک جاوید کو نہ مقدمے میں نامزد کیا گیا تھا اور نہ ہی ان کے خلاف براہ راست کوئی ثبوت ہے۔ انہیں ان کی بہن صنم جاوید کی سیاسی سرگرمیوں کی وجہ سے نشانہ بنایا جا رہا ہے۔

وکیل نے مزید کہا کہ این سی سی آئی اے نے گزشتہ ریمانڈ میں موبائل برآمد کرنے کا مؤقف اپنایا تھا، لیکن ملزمہ مسلسل جیل میں ہیں اور انہیں کسی برآمدگی کے لیے باہر نہیں لے جایا گیا۔ انہوں نے عدالت سے استدعا کی کہ فلک جاوید کا مزید جسمانی ریمانڈ نہ دیا جائے اور انہیں جوڈیشل ریمانڈ پر جیل بھیجنے کا حکم دیا جائے۔ تاہم عدالت نے فریقین کے دلائل سننے کے بعد جسمانی ریمانڈ میں 4 روز کی توسیع کر دی۔