پاکستان میں جدید بینکاری کے ایک نئے دور کا آغاز ہوگیا ہے۔ اسٹیٹ بینک آف پاکستان نے رئیل ٹائم انٹربینک پیمنٹ سیٹلمنٹ سسٹم کے جدید ورژن پرزم پلس کو متعارف کرایا ہے۔ گورنر اسٹیٹ بینک جمیل احمد نے افتتاحی تقریب سے خطاب کرتے ہوئے کہا کہ یہ نظام پاکستان میں ڈیجیٹل ٹرانسفارمیشن کا نیا باب ثابت ہوگا۔

تقریب میں اعلیٰ حکومتی و بینکاری عہدیداران کے ساتھ ساتھ عالمی مالیاتی اداروں کے نمائندے بھی شریک ہوئے۔ گورنر کے مطابق گزشتہ برس پرانے نظام کے تحت 1043 کھرب روپے مالیت کی ٹرانزیکشنز پروسیس کی گئیں، جو ملک کی جی ڈی پی سے دس گنا زیادہ ہیں۔ ان میں سب سے بڑا حصہ حکومتی سیکیورٹیز کے لین دین کا تھا، جب کہ زیادہ تر ٹرانزیکشنز کسٹمر ٹرانسفرز پر مشتمل تھیں۔

جمیل احمد نے بتایا کہ ملک میں موبائل بینکنگ ایپس کے 2 کروڑ 80 لاکھ، برانچ لیس بینکنگ کے 7 کروڑ 10 لاکھ اور انٹرنیٹ بینکنگ کے ایک کروڑ 70 لاکھ صارفین اس بات کا ثبوت ہیں کہ پاکستان تیزی سے ڈیجیٹل مالیاتی نظام کی طرف بڑھ رہا ہے۔

انہوں نے کہا کہ پرزم پلس جدید عالمی معیار ISO 20022 پر مبنی ہے، جو مالیاتی لین دین میں شفافیت، سیکورٹی اور مربوط سہولت فراہم کرے گا۔ اس نظام میں لیکویڈیٹی مینجمنٹ، مستقبل کی ادائیگیوں کی شیڈولنگ، اور مرکزی سیکیورٹیز ڈپازٹری کے ساتھ انضمام جیسے فیچرز شامل ہیں، جو نیلامیوں اور اوپن مارکیٹ آپریشنز کو مزید آسان بنا دیں گے۔

گورنر کے مطابق ورلڈ بینک کے تعاون سے متعارف کرایا گیا یہ نظام پاکستان کی مالیاتی صنعت اور کاروباری طبقے کے لیے ایک انقلابی پیش رفت ہے۔

پاکستان کی نامور اداکارہ ماہرہ خان نے حالیہ بارشوں اور سیلابی صورتحال کے دوران پیش آنے والا اپنا خوفناک تجربہ شیئر کیا ہے۔ انسٹاگرام پر ایک اسٹوری میں انہوں نے بتایا کہ نتھیا گلی سے واپسی کے وقت انہیں مسلسل یہ خوف لاحق رہا کہ کہیں لینڈ سلائیڈنگ یا اچانک آنے والا سیلابی ریلا انہیں اپنی لپیٹ میں نہ لے لے۔ ماہرہ خان کا کہنا تھا کہ راستے میں وہ بار بار بے بسی محسوس کر رہی تھیں اور ان کا ذہن بار بار ان ہزاروں متاثرین کی طرف جاتا رہا جو ان دنوں بارشوں اور سیلاب سے متاثر ہو کر اپنی زندگیاں اور گھر بچانے کی جدوجہد کر رہے ہیں۔ اداکارہ نے لکھا کہ قدرتی آفات کے سامنے انسان کتنا بے بس ہوجاتا ہے، یہ انہیں اب بخوبی سمجھ آیا ہے۔ ماہرہ خان نے تباہ کن بارشوں اور اس کے نتیجے میں ہونے والے جانی و مالی نقصان پر افسوس کا اظہار کرتے ہوئے خدا سے رحم اور حفاظت کی دعا بھی کی۔ واضح رہے کہ حالیہ غیر معمولی بارشوں اور سیلاب کے باعث خیبر پختونخوا اور گلگت بلتستان میں 400 سے زائد افراد جاں بحق جبکہ سندھ اور کراچی میں اربن فلڈنگ سے شہری شدید مشکلات کا شکار ہیں۔