بھارتی فلم اور ٹی وی انڈسٹری کے معروف اداکار پنکج دھیر کینسر کے باعث 68 سال کی عمر میں انتقال کر گئے۔
بھارتی میڈیا رپورٹس کے مطابق وہ طویل عرصے سے کینسر میں مبتلا تھے اور حالیہ مہینوں میں ان کی طبیعت انتہائی خراب ہو گئی تھی۔ علاج کے دوران انہوں نے بڑی سرجری بھی کروائی تھی، مگر طبیعت سنبھل نہ سکی۔

پنکج دھیر نے بھارتی ٹی وی اور فلم انڈسٹری میں کئی یادگار کردار نبھائے۔ ان کے مشہور ڈرامے “مہا بھارت” میں کرن کے کردار نے انہیں بے پناہ شہرت دلائی۔
مداح آج بھی انہیں اس کردار کے ذریعے یاد کرتے ہیں۔

اداکار کے قریبی ذرائع کے مطابق، پنکج دھیر کے پسماندگان میں اہلیہ انیتا دھیر اور دو بچے شامل ہیں۔ بھارتی شوبز انڈسٹری میں ان کے انتقال پر گہرے دکھ اور افسوس کا اظہار کیا جا رہا ہے۔

بالی ووڈ کی مشہور اداکارہ اور سابقہ مس یونیورس سشمیتا سین نے ایک حالیہ انٹرویو میں اپنی بیٹی گود لینے کی کہانی سناتے ہوئے بتایا کہ انہیں قانونی اور سماجی رکاوٹوں کا سامنا کرنا پڑا۔
انہوں نے کہا کہ سن 2000 میں جب وہ صرف 24 سال کی تھیں، تو انہوں نے پہلی بیٹی رینی کو گود لینے کا فیصلہ کیا — حالانکہ اس وقت غیر شادی شدہ خواتین کے لیے یہ ایک غیر معمولی قدم سمجھا جاتا تھا۔

سشمیتا سین نے بتایا کہ جب وہ عدالت میں بچی کو گود لینے کا مقدمہ لے کر گئیں تو انہیں ڈر تھا کہ اگر فیصلہ ان کے خلاف آیا تو رینی ان سے واپس لے لی جائے گی۔ ان کے والد شوبیر سین نے اس موقع پر غیر معمولی تعاون کیا اور اپنی جائیداد کا نصف حصہ رینی کے نام کر دیا تاکہ قانونی شرط پوری ہو سکے۔

اداکارہ نے مزید بتایا کہ عدالت کے جج نے ان کے والد سے کہا،

“اگر آپ بیٹی کو گود لینے دیں گے تو اس سے کوئی اچھا لڑکا شادی نہیں کرے گا۔”
جس پر والد نے جواب دیا،
“میں نے اپنی بیٹی کو کسی کی بیوی بننے کے لیے نہیں بلکہ خود مختار انسان بننے کے لیے پالا ہے۔”

عدالت کے فیصلے کے بعد سشمیتا سین بھارت کی پہلی سنگل مدر بننے والی مشہور شخصیت بن گئیں۔ چند سال بعد انہوں نے دوسری بیٹی علیشہ کو بھی گود لیا۔