پاکستان نے خلائی ٹیکنالوجی میں ایک اور سنگِ میل عبور کر لیا ہے، کیونکہ نیا ریموٹ سینسنگ سیٹلائٹ کامیابی سے مدار میں پہنچ کر فعال ہو گیا ہے۔ پاکستان اسپیس اینڈ اپر اٹماسفیئر ریسرچ کمیشن (سپارکو) نے تصدیق کی ہے کہ 31 جولائی 2025 کو یہ سیٹلائٹ چین کے ژیچانگ لانچ سینٹر سے روانہ ہوا اور گراؤنڈ اسٹیشنز کے ساتھ مستحکم رابطہ قائم کر چکا ہے۔ جدید سیٹلائٹ ہائی ریزولوشن تصاویر فراہم کر رہا ہے جو شہری منصوبہ بندی، انفراسٹرکچر کی ترقی اور علاقائی منصوبہ بندی میں انقلاب لانے کے ساتھ ساتھ قدرتی آفات جیسے سیلاب، زلزلے اور زمین کے کھسکنے کی بروقت پیشگوئی میں مددگار ہوں گی۔ اس کے علاوہ یہ سیٹلائٹ ماحولیاتی تبدیلی، جنگلات کی کٹائی، گلیشیئر کے پگھلنے اور زرعی پیداوار کی بہتری کے لیے بھی قیمتی ڈیٹا فراہم کرے گا۔ سی پیک سمیت قومی ترقیاتی منصوبوں میں بھی یہ سیٹلائٹ اہم کردار ادا کرے گا۔ سپارکو کے مطابق یہ کامیابی پاکستان کی تکنیکی خودمختاری، پائیدار ترقی اور فیصلہ سازی کے عمل کو مزید مستحکم بنائے گی۔

ایک تازہ رپورٹ کے مطابق ٹیکنالوجی کمپنی ایپل مصنوعی ذہانت سے چلنے والے روبوٹ اور کئی دیگر اسمارٹ ڈیوائسز پر کام کر رہی ہے۔ بلومبرگ کی رپورٹ کے مطابق ان ڈیوائسز میں ہوم سیکیورٹی کیمرا اور سری انیبلڈ اسمارٹ اسپیکر شامل ہیں، جنہیں 2027 میں متعارف کرائے جانے کا امکان ہے۔ ایپل کا نیا روبوٹ جسے جے 595 کا نام دیا گیا ہے، ایک مکینکی جسم پر مشتمل ہوگا جس کے اوپر آئی پیڈ منی اسکرین نصب ہوگی۔ یہ روبوٹ صارف کے پیچھے گھر کے اندر حرکت کر سکے گا اور میز یا کچن کے کاؤنٹر پر روزمرہ کے کاموں میں مدد فراہم کرنے کے لیے ڈیزائن کیا گیا ہے۔ اس روبوٹ کے ساتھ منسلک ایپ صارفین کو فاصلے سے روبوٹ کو کنٹرول کرنے کی سہولت دے گی جبکہ جدید ورژن کی سری پہلے سے زیادہ بہتر اور متنوع سہولیات پیش کرے گی۔