بالی ووڈ کے مسٹر پرفیکشنسٹ عامر خان نے پریس کانفرنس کا اعلان کرکے مداحوں اور سوشل میڈیا صارفین کو حیران کر دیا ہے۔ عامر خان پروڈکشنز کی جانب سے جاری ایک نوٹ کے مطابق 29 جولائی کو ایک اہم اعلان کے لیے پریس کانفرنس منعقد کی جائے گی، جس نے سب کی توجہ اپنی جانب کھینچ لی ہے۔

اس اعلان کے بعد مداحوں میں چہ مگوئیاں شروع ہوگئی ہیں کہ عامر خان اپنی تیسری شادی کا اعلان کرنے جا رہے ہیں۔ اس قیاس آرائی کی ایک بڑی وجہ یہ ہے کہ اس سے قبل بھی انہوں نے پریس کانفرنس میں اپنی گرل فرینڈ گوری کے ساتھ تعلقات کا انکشاف کیا تھا۔ حال ہی میں ایک انٹرویو میں عامر خان نے کہا تھا کہ ’’گوری اور میں ایک سنجیدہ رشتے میں ہیں، دل سے میں پہلے ہی شادی کرچکا ہوں مگر اب رسمی طور پر شادی کرنا باقی ہے‘‘۔

واضح رہے کہ عامر خان کی یہ تیسری شادی ہوگی۔ اس سے قبل وہ دو شادیاں کرچکے ہیں جو ناکام رہیں۔ ان کی پہلی بیوی رینا دتہ سے ان کے دو بچے ہیں، جبکہ دوسری بیوی معروف فلمساز کرن راؤ تھیں جن سے ان کا ایک بیٹا ہے۔ تاہم دونوں شادیوں کا اختتام طلاق پر ہوا۔

پاکستان شوبز انڈسٹری کے سینئر اور قابل احترام اداکار عاصم بخاری حال ہی میں دل کے عارضے میں مبتلا ہوگئے۔ طبیعت خراب ہونے پر انہیں فوری طور پر لاہور کے پنجاب انسٹی ٹیوٹ آف کارڈیالوجی منتقل کیا گیا، جہاں ڈاکٹروں کے مطابق انہیں دل کا دورہ پڑا اور اس کے نتیجے میں ان کے پھیپھڑوں میں پانی بھی بھر گیا۔ تاہم خوش قسمتی سے بروقت علاج کے باعث ان کی حالت میں نمایاں بہتری آئی اور انہیں اسپتال سے ڈسچارج کر دیا گیا ہے۔ عاصم بخاری شوبز کی دنیا میں ایک معروف نام ہیں، جنہوں نے ٹی وی، فلم اور تھیٹر کے شعبوں میں اپنی فنکارانہ صلاحیتوں سے ناظرین کے دل جیتے۔ وہ نہ صرف ایک منجھے ہوئے اداکار ہیں بلکہ ادیب اور شاعر کے طور پر بھی پہچانے جاتے ہیں۔ ان کے مشہور ڈراموں میں بانو بازار، مایا، محبت بہتا دریا، ایک ستم اور سہی، عشق پاگل کرائے اور قلندر شامل ہیں۔ ان کی صحت یابی پر شوبز حلقوں اور مداحوں نے خوشی کا اظہار کیا ہے۔