الیکشن کمیشن آف پاکستان نے تحریک انصاف کے رکن قومی اسمبلی جمشید دستی کو جعلی تعلیمی اسناد کی بنیاد پر نااہل قرار دے دیا ہے۔ الیکشن کمیشن کی جانب سے یہ فیصلہ سپیکر قومی اسمبلی سردار ایاز صادق کی جانب سے دائر کردہ ریفرنس پر محفوظ کیا گیا تھا جو اب جاری کر دیا گیا ہے۔ فیصلے میں کہا گیا کہ جمشید دستی نے اپنے کاغذاتِ نامزدگی میں اثاثے چھپائے اور جھوٹے تعلیمی کوائف جمع کروائے۔ درخواست گزار کے مطابق جمشید دستی نے ایف اے پاس ہونے کا دعویٰ کیا تھا، جب کہ وہ نہ میٹرک پاس ہیں نہ ایف اے۔ یاد رہے کہ جمشید دستی نے اپنی سیاسی زندگی کا آغاز پاکستان پیپلز پارٹی سے کیا تھا اور بعد ازاں آزاد امیدوار کی حیثیت سے الیکشن جیت کر حنا ربانی کھر کے والد کو شکست دی تھی۔ حالیہ انتخابات میں وہ پاکستان تحریک انصاف کے حمایت یافتہ امیدوار کے طور پر کامیاب ہوئے، اور ان کا شمار ان افراد میں ہوتا ہے جنہیں 9 مئی کے بعد مبینہ طور پر پارٹی چھوڑنے کے لیے دباؤ کا سامنا رہا۔

اڈیالہ جیل راولپنڈی کے سپرنٹنڈنٹ کی جانب سے جاری کردہ وضاحت میں کہا گیا ہے کہ پاکستان تحریک انصاف کے پیٹرن انچیف عمران خان کو جیل میں قانون کے مطابق بی کلاس سہولیات فراہم کی جا رہی ہیں۔ پریس ریلیز کے مطابق عمران خان کو خوراک، کتب و اخبارات کے مطالعے، ورزش اور چہل قدمی کی مکمل آزادی حاصل ہے اور انہیں سات سیلز پر مشتمل ایک علیحدہ کمپلیکس میں رکھا گیا ہے جہاں کھلا صحن بھی موجود ہے۔ سپرنٹنڈنٹ نے بتایا کہ عمران خان کے پاس ورزش کے لیے سائیکل اور تفریح کے لیے ایل ای ڈی بھی میسر ہے جبکہ ان کے ذاتی ذوق کے مطابق اخبارات اور کتب کی سہولت بھی دی گئی ہے۔ انہیں کھانے کے لیے ایک قیدی باورچی بھی فراہم کیا گیا ہے جو ان کی ہدایات کے مطابق کھانا تیار کرتا ہے۔

پریس ریلیز میں مزید کہا گیا کہ عمران خان نے جیل سے اب تک 413 مرتبہ ٹوئٹر پر پیغامات بھجوائے اور 10 بین الاقوامی میڈیا اداروں کو انٹرویوز بھی دیے ہیں۔ وہ سماعتوں کے دوران صحافیوں سے براہِ راست بھی مخاطب رہے جبکہ گزشتہ تین ماہ کے دوران ان سے 66 ملاقاتیں ہو چکی ہیں جن میں سیاسی رہنما، وکلاء اور خاندان کے افراد شامل ہیں۔ جیل سپرنٹنڈنٹ کے مطابق عمران خان کی صحت کے روزانہ تین مرتبہ معائنے کیے جا رہے ہیں اور حالیہ دو ہفتوں میں کسی بیماری کی کوئی شکایت موصول نہیں ہوئی۔ انتظامیہ نے سوشل میڈیا پر گردش کرنے والی افواہوں کو بے بنیاد قرار دیتے ہوئے کہا کہ عمران خان کے ساتھ کوئی امتیازی سلوک نہیں کیا جا رہا اور ان کی سکیورٹی اور صحت کا مکمل خیال رکھا جا رہا ہے۔