پاکستان ٹیلی کمیونیکیشن اتھارٹی (پی ٹی اے) نے نیٹ ورک کی نگرانی، کارکردگی میں بہتری اور صارفین کے مفادات کے تحفظ کو یقینی بنانے کے لیے عالمی سطح پر معروف نیٹ ورک اینالٹکس ادارے اوپن سگنل کے ساتھ شراکت داری کر لی ہے۔ پی ٹی اے کے جاری کردہ اعلامیے کے مطابق یہ اشتراک نیٹ ورک کی توسیع، سرمایہ کاری کے فروغ اور صارفین کو بہتر سروسز فراہم کرنے میں اہم کردار ادا کرے گا۔

اوپن سگنل پاکستان میں نیٹ ورک مانیٹرنگ سسٹم کو مضبوط بنانے میں مدد فراہم کرے گا، جس کے ذریعے صارفین کو 4G اور 5G کی رفتار، لیٹنسی اور کوریج کے خلا سے متعلق حقیقی وقت میں معلومات حاصل ہوں گی۔ اس شراکت داری سے پی ٹی اے کو بین الاقوامی معیار کے مطابق فیصلے کرنے کے لیے مستند ڈیٹا دستیاب ہوگا، جس سے نہ صرف نیٹ ورک کی کارکردگی بہتر بنے گی بلکہ صارفین کے تجربے میں بھی نمایاں بہتری آئے گی۔

وزیراعظم شہباز شریف سے نانگا پربت سر کرنے والی قطری شہزادی اور معروف کوہ پیما شیخہ اسماء الثانی نے ملاقات کی، جس دوران وزیراعظم نے ان کے عزم، حوصلے اور صنفی مساوات کے لیے کی جانے والی کوششوں کو سراہا۔ وزیراعظم نے شیخہ اسماء کی کامیابی پر مبارکباد پیش کرتے ہوئے انہیں پاکستان کی ماؤنٹینز اینڈ ٹورازم کی برانڈ ایمبیسڈر مقرر کرنے کا اعلان کیا۔

وزیراعظم کا کہنا تھا کہ دنیا کی 14 بلند ترین چوٹیوں میں سے 5 پاکستان میں واقع ہیں، جو ملک کے لیے باعث فخر ہیں۔ انہوں نے پاکستانی پورٹرز اور گائیڈز کی خدمات کو بھی سراہا جنہوں نے کوہ پیماؤں کو عالمی معیار کی معاونت فراہم کی۔ وزیراعظم نے کہا کہ شیخہ اسماء کی کامیابی نہ صرف ایک نمایاں کارنامہ ہے بلکہ یہ پاکستان اور قطر کے درمیان دوستانہ تعلقات کی عکاسی بھی کرتی ہے۔ شیخہ اسماء الثانی نے پاکستان میں ملنے والی مہمان نوازی اور تعاون پر وزیراعظم اور پاکستانی عوام کا شکریہ ادا کیا۔