امریکی فضائیہ نے اسپیس ایکس کے ساتھ مل کر جاری راکٹ کارگو منصوبے کو عارضی طور پر معطل کر دیا ہے، اور اس کی وجہ ماحولیاتی ماہرین کی طرف سے ظاہر کیے گئے خدشات ہیں۔ امریکی فضائیہ منصوبہ جانسٹن ایٹول نامی ایک حساس جزیرے پر تجرباتی طور پر کارگو راکٹ لانچ کرنے سے متعلق تھا، جس کے تحت راکٹ کے ذریعے 100 ٹن وزنی سامان صرف 90 منٹ میں کسی بھی جگہ پہنچایا جا سکتا تھا۔ تاہم اس جزیرے کی ماحولیاتی اہمیت کے پیش نظر منصوبے پر فوری عمل درآمد روک دیا گیا۔

جانسٹن ایٹول، جو کہ بحرالکاہل میں واقع ہے، صرف ایک مربع میل پر مشتمل ہے لیکن یہاں 14 مختلف اقسام کے پرندے موجود ہیں جو اسے افزائش نسل کے لیے استعمال کرتے ہیں۔ ماہرینِ ماحولیات نے خبردار کیا کہ راکٹ کے لانچ کے دوران ہونے والا شور، ارتعاش اور انفراسٹرکچر کی تبدیلیاں ان پرندوں کی نیسٹنگ اور قدرتی ماحول کو بری طرح متاثر کر سکتی ہیں۔

ماحولیات کے تحفظ کے لیے سرگرم گروپس نے اس منصوبے کی شدید مخالفت کی، اور ایک آن لائن پٹیشن پر 3,800 سے زائد دستخط جمع ہوئے، جس کے نتیجے میں پروجیکٹ پر عملدرآمد روک دیا گیا۔ اگرچہ فضائیہ نے پہلے ماحولیاتی تجزیہ کرانے کا اعلان کیا تھا، مگر ڈرافٹ رپورٹ تاحال جاری نہیں کی گئی۔

فضائیہ کا کہنا ہے کہ وہ اب ایسے متبادل مقامات کی تلاش میں ہے جہاں اس منصوبے کو ماحولیاتی نقصان کے بغیر مکمل کیا جا سکے۔ اگر کسی نئے مقام کا انتخاب ہوا اور ماحولیاتی تجزیہ کامیابی سے مکمل کیا گیا، تو یہ منصوبہ دوبارہ شروع کیا جا سکتا ہے۔

ناسا نے حال ہی میں ایک تیسرے بین السیّاروی (Interstellar) برفانی شہاب ثاقب کی دریافت کی تصدیق کی ہے، جو سورج کے نظام سے گزرتے ہوئے دیکھا گیا۔ یہ دریافت چلی میں واقع ایٹلاس ٹیلی اسکوپ کے ذریعے 1 جولائی 2025 کو کی گئی۔ یہ خلائی جسم، جو برف اور گیس پر مشتمل ہے، ایک “برفانی گیند” کی مانند دکھائی دیتا ہے اور زمین کے لیے بالکل بے ضرر ہے کیونکہ اس کا راستہ زمین سے محفوظ فاصلے پر ہے۔

ناسا کے مطابق یہ تیسرا شہاب ثاقب ہے جسے ہماری کہکشاں کے باہر کسی دوسرے ستارے یا نظام سے آتے ہوئے دیکھا گیا ہے۔ اس سے قبل 2017 اور 2019 میں دو ایسے بین السیّاروی برفانی اجسام دریافت ہو چکے ہیں۔ ایٹلاس دوربین جس کے ذریعے اس خلائی جسم کی نشاندہی ہوئی، زمین سے ممکنہ طور پر ٹکرا سکنے والے اجسام کی نگرانی کے لیے وقف ہے۔

یہ دریافت نہ صرف خلا سے آنے والے اجسام کے مطالعے میں ایک اہم پیشرفت ہے بلکہ یہ ہماری کہکشاں کے باہر کے اجسام کو سمجھنے میں بھی مدد فراہم کرتی ہے، جس سے سائنس دانوں کو کائنات کے بارے میں مزید نئی معلومات حاصل ہو سکتی ہیں۔