پاکستان میں سیٹلائٹ انٹرنیٹ سروس فراہم کرنے والی معروف عالمی کمپنی اسٹارلنک کو لائسنس کے حصول میں بڑی رکاوٹوں کا سامنا ہے، جس کے باعث اس کا انٹرنیٹ فراہمی کا منصوبہ تاخیر کا شکار ہو گیا ہے۔ سرکاری ذرائع کے مطابق، پاکستان اسپیس ایکٹیویٹیز ریگولیٹری بورڈ (PSARB) نے اسٹارلنک کی عارضی رجسٹریشن ختم کر دی ہے۔ یہ رجسٹریشن کمپنی کو 21 مارچ کو دی گئی تھی، لیکن پاکستان ٹیلی کمیونیکیشن اتھارٹی (PTA) نے واضح کیا تھا کہ مستقل رجسٹریشن کے لیے لائسنس کا حصول لازمی ہے۔

اسٹارلنک مقررہ وقت میں لائسنس حاصل کرنے میں ناکام رہا، جس کے باعث جون 2025 میں اس کی عارضی رجسٹریشن کی مدت مکمل ہو گئی۔ کمپنی کے حکام نے تصدیق کی ہے کہ وہ اس صورتحال کا جائزہ لے رہے ہیں اور سرکاری پالیسی کے مزید واضح ہونے کا انتظار کر رہے ہیں تاکہ آئندہ کے لائحہ عمل کا فیصلہ کیا جا سکے۔ پاکستان میں تیز رفتار انٹرنیٹ کی بڑھتی ہوئی ضرورت کے پیش نظر صارفین اس سروس کے آغاز کے منتظر تھے، تاہم ریگولیٹری مسائل کی وجہ سے منصوبہ غیر یقینی صورتحال سے دوچار ہو گیا ہے۔

وزیراعلیٰ خیبرپختونخوا علی امین گنڈاپور نے کہا ہے کہ وہ مخصوص نشستوں کے معاملے پر عدالت سے رجوع کرنے جا رہے ہیں، کیونکہ انہوں نے اپنے کاغذات نامزدگی میں خود کو آزاد امیدوار ظاہر نہیں کیا تھا بلکہ واضح طور پر پاکستان تحریک انصاف (پی ٹی آئی) کا رکن لکھا تھا۔ اپنے ایک بیان میں ان کا کہنا تھا کہ وہ پی ٹی آئی کے نمائندہ ہیں، اور مخصوص نشستوں کے حق سے محروم نہیں کیا جا سکتا۔

علی امین گنڈاپور نے کہا کہ سینیٹ کے 21 جولائی کو ہونے والے انتخابات کے حوالے سے مشاورت جاری ہے۔ انہوں نے دعویٰ کیا کہ خیبرپختونخوا میں حکومت مکمل طور پر مستحکم ہے اور کوئی رکن اسمبلی حکومتی صفوں سے نہیں جا رہا۔ انہوں نے تحریک عدم اعتماد کی خواہش رکھنے والوں کو خبردار کرتے ہوئے کہا کہ وہ زمینی حقائق کا ادراک کریں۔

انہوں نے مزید کہا کہ بجٹ کی منظوری حکومت کے لیے اہم مرحلہ تھا، اور اگر یہ مرحلہ ناکام ہوتا تو حکومت کو نقصان پہنچتا۔ انہوں نے اس تاثر کو رد کیا کہ حکومت بجٹ پیش نہیں کر رہی تھی، اور کہا کہ ایسا پروپیگنڈا اپنوں نے ہی کیا۔ تاہم، پارٹی کے پیٹرن انچیف نے بجٹ منظوری پر اطمینان کا اظہار کیا ہے۔ علی امین گنڈاپور نے انکشاف کیا کہ دو ارکان نے بجٹ کے حق میں ووٹ نہیں دیا، اور سب جانتے ہیں کہ وہ کن کے لوگ ہیں۔

دریائے سوات واقعے سے متعلق بات کرتے ہوئے انہوں نے کہا کہ متاثرہ فیملی پنجاب کا ڈومیسائل رکھتی ہے، اس لیے انہیں خیبرپختونخوا میں سرکاری نوکری دینا ممکن نہیں۔ تاہم، متاثرین کے لواحقین کو فی کس 20 لاکھ روپے کے حساب سے 2 کروڑ روپے کا معاوضہ دیا جائے گا، اور انہیں یہ بھی مشورہ دیا گیا ہے کہ اس رقم کو کاروبار میں کیسے استعمال کیا جا سکتا ہے۔