حال ہی میں ماہرینِ فلکیات نے ایک انتہائی قدیم کہکشاں دریافت کی ہے جو تقریباً 13 ارب سال سے غیر متغیر حالت میں موجود ہے۔ اس انقلابی دریافت کو جیمز ویب اسپیس ٹیلی اسکوپ کی مدد سے ممکن بنایا گیا، جو کائنات کے ابتدائی دور کی جھلک دکھانے کی صلاحیت رکھتی ہے۔ماہرینِ فلکیات دریافت شدہ کہکشاں کا نام JADES-GS-z7-LA رکھا گیا ہے اور اسے سائنسی اصطلاح میں “relaxed fossil galaxy” کہا جا رہا ہے، کیونکہ اس میں ستاروں کی پیدائش کی سرگرمی نہ ہونے کے برابر ہے۔ سائنسدانوں کے مطابق یہ کہکشاں اس وقت کی ہے جب کائنات کی عمر صرف 70 کروڑ سال تھی۔ حیرت انگیز طور پر، اس کہکشاں کا ساخت، شکل اور درجہ حرارت اربوں سالوں میں بہت کم بدلے ہیں، جس سے یوں محسوس ہوتا ہے جیسے یہ کائناتی وقت میں “منجمد” ہو چکی ہو۔ ماہرین کا خیال ہے کہ یہ کہکشاں اپنی ابتدائی عمر ہی میں ستارے بنانے کا عمل روک چکی تھی اور اس پر دیگر کہکشاؤں کے تصادم یا کسی بیرونی اثرات کا کوئی خاص اثر نہیں پڑا، جس کے باعث یہ اپنی ابتدائی حالت میں محفوظ رہی۔ یہ دریافت کائناتی ارتقا کو سمجھنے میں اہم پیش رفت قرار دی جا رہی ہے۔

پاکستان میں سائنس اور ٹیکنالوجی کے شعبے میں خدمات انجام دینے والے ماہرین کی حوصلہ افزائی کے لیے صدارتی ایوارڈز اور قومی اعزازات دینے کی تیاریاں جاری ہیں۔ اس سلسلے میں وفاقی وزیر سائنس و ٹیکنالوجی خالد حسین مگسی کی زیر صدارت ایک اہم اجلاس منعقد ہوا، جس میں مختلف شعبوں میں نمایاں کارکردگی دکھانے والے ماہرین کے ناموں پر مشاورت کی گئی۔ اجلاس میں سائنس، ٹیکنالوجی، انجینئرنگ اور تعلیم جیسے اہم شعبوں میں خدمات انجام دینے والوں کو نامزد کرنے پر غور کیا گیا۔ وفاقی وزیر کا کہنا تھا کہ پاکستان کے سائنسدان عالمی معیار پر پورا اترتے ہیں اور حکومت ان کی حوصلہ افزائی کے لیے پرعزم ہے۔ انہوں نے واضح کیا کہ وزارت سائنس و ٹیکنالوجی کی جانب سے میرٹ اور شفافیت کو مدنظر رکھتے ہوئے یہ عمل جاری ہے تاکہ باصلاحیت پاکستانیوں کو ان کی خدمات کا صلہ دیا جا سکے۔ خالد مگسی کا کہنا تھا کہ یومِ آزادی کے موقع پر ان سائنسدانوں اور ماہرین کو اعزازات سے نوازا جائے گا، جبکہ پسماندہ علاقوں سے تعلق رکھنے والے ماہرین کو بھی خصوصی طور پر مدنظر رکھا جائے گا۔ ان کا مزید کہنا تھا کہ ان اعزازات کے ذریعے نوجوانوں کو تحقیق، سائنس اور جدت کے میدان کی طرف راغب کیا جا سکے گا، کیونکہ ان شعبوں میں ترقی ہی ملک کی ترقی کا ضامن ہے۔ حکومت سائنس اور ٹیکنالوجی سے وابستہ افراد کی خدمات کو نہ صرف تسلیم کرتی ہے بلکہ ان کی عزت افزائی کو قومی فریضہ سمجھتی ہے۔