چین میں ایک عسکری تحقیقاتی ادارے نے مچھر کے سائز کے جدید جاسوس ڈرون کی رونمائی کی ہے، جو اپنے انتہائی چھوٹے سائز اور خفیہ صلاحیتوں کی بدولت جنگی میدانوں میں خاص اہمیت رکھتا ہے۔ یہ غیر انسانی فضائی آلہ (یو اے وی) بال کی باریکی جیسی ٹانگیں اور دو پر رکھتا ہے، اور اسے اسمارٹ فون کے ذریعے کنٹرول کیا جا سکتا ہے۔ اس مائیکرو ڈرون کو چین کے صوبہ ہونان میں واقع نیشنل یونیورسٹی آف ڈیفنس ٹیکنالوجی کے محققین نے تیار کیا ہے، جس میں ایسے حساس سینسر نصب کیے گئے ہیں جو اسے خفیہ ملٹری مشن کے لیے انتہائی مؤثر بناتے ہیں۔ سرکاری ملٹری چینل سی سی ٹی وی 7 کو دیے گئے انٹرویو میں یونیورسٹی کے ایک طالب علم لائینگ ہیشائینگ نے بتایا کہ یہ بائیونک روبوٹ میدانِ جنگ میں معلومات جمع کرنے اور مخصوص مشن پر کارروائی کے لیے مفید ہیں۔ یہ ڈرون جدید رجحان کا حصہ ہے جس میں مائیکرو ڈرونز کو کمرشل اور عسکری مقاصد کے لیے استعمال کیا جا رہا ہے۔ محققین کا کہنا ہے کہ مستقبل میں اس ڈیوائس کو ماحولیاتی نگرانی، قدرتی آفات کی پیشگوئی اور حتیٰ کہ زرعی میدان میں مصنوعی زیرگی کے لیے بھی استعمال کیا جا سکتا ہے۔

ملک کے معروف قانون دان چوہدری اعتزاز احسن نے ایک انٹرویو میں عدالتی فیصلوں پر ادارہ جاتی دباؤ کا الزام لگاتے ہوئے کہا ہے کہ پاکستان میں عدالتوں سے وہی فیصلے آتے ہیں جو آرمی چیف کی مرضی ہو۔ سماء نیوز کو دیے گئے انٹرویو میں ان کا کہنا تھا کہ وہ کھل کر یہ بات کہہ رہے ہیں کہ عدالتی نظام میں اوپر سے نیچے تک فیصلے انہی ہدایات کی بنیاد پر ہوتے ہیں، جو عسکری قیادت کی طرف سے دی جاتی ہیں۔ اعتزاز احسن نے کہا کہ سابق آرمی چیف جنرل قمر جاوید باجوہ کو نواز شریف نے خود تعینات کیا تھا، مگر کچھ عرصے بعد نواز شریف کو جیل بھیج دیا گیا۔ بعد ازاں وہ سزا یافتہ ہونے کے باوجود لندن چلے گئے، حالانکہ عام طور پر عدالت کی اجازت کے بغیر ایسا ممکن نہیں ہوتا۔ انہوں نے مزید کہا کہ نواز شریف، لندن بیٹھ کر جنرل باجوہ کے خلاف بیانات دیتے رہے لیکن جب باجوہ کی مدت ملازمت میں توسیع کی بات آئی تو نواز شریف نے اپنے ارکانِ اسمبلی کو ہدایت دی کہ قومی اسمبلی میں جا کر اس توسیع کے حق میں ووٹ دیں۔

دوسری جانب اعتزاز احسن نے 7 مئی 2025 کو سپریم کورٹ کی جانب سے عام شہریوں کے فوجی عدالتوں میں ٹرائل کے فیصلے کے خلاف نظرثانی اپیل بھی دائر کر دی ہے۔ یہ اپیل سینئر وکیل سردار لطیف کھوسہ کے توسط سے جمع کروائی گئی، جس میں مؤقف اختیار کیا گیا ہے کہ یہ فیصلہ بنیادی حقوق، آئین کی روح اور انصاف کے تقاضوں کے برخلاف ہے، لہٰذا اس اہم اور حساس نوعیت کے کیس کی سماعت تمام حاضر سروس ججز پر مشتمل فل کورٹ کے ذریعے کی جائے۔ اعتزاز احسن کا کہنا ہے کہ فوجی عدالتوں میں عام شہریوں کے ٹرائل سے شہری آزادیوں اور آئینی ضمانتوں پر ضرب پڑتی ہے جس کا جائزہ لینا ضروری ہے