کراچی سے جاری کردہ ایک اعلامیے کے مطابق اسٹیٹ بینک آف پاکستان نے اطلاع دی ہے کہ یکم جولائی کو بینک ہالیڈے ہوگا جس کے باعث تمام بینک، ترقیاتی مالیاتی ادارے اور مائیکروفنانس بینک عوام کے لیے لین دین بند رکھیں گے۔ اسٹیٹ بینک کے مطابق یہ تعطیل سالانہ بینک کلوزنگ کے سلسلے میں دی جا رہی ہے تاکہ ادارے اپنی سالانہ مالیاتی حساب کتاب مکمل کر سکیں۔یکم جولائی کو بینک ہالیڈے ،اگرچہ عوامی لین دین بند ہوگا، لیکن بینکوں اور مالیاتی اداروں کا عملہ حسبِ معمول دفاتر میں موجود رہے گا تاکہ انتظامی و داخلی امور انجام دیے جا سکیں۔ عوام کو مشورہ دیا گیا ہے کہ وہ اپنے مالی معاملات یکم جولائی سے قبل مکمل کر لیں۔

بھارتی پنجابی اداکارہ نیرو باجوہ نے اپنی نئی فلم ’سردار جی 3‘ میں پاکستانی اداکارہ ہانیہ عامر کے ساتھ کام کرنے کے باوجود انہیں انسٹاگرام پر ان فالو کر دیا ہے، جبکہ فلم سے متعلق تمام پروموشنل پوسٹس بھی سوشل میڈیا سے ہٹا دی گئی ہیں۔ اس غیر متوقع اقدام نے سوشل میڈیا صارفین میں تشویش کی لہر دوڑا دی ہے اور مختلف قیاس آرائیاں جنم لے رہی ہیں۔ کچھ اطلاعات کے مطابق نیرو باجوہ کو انتہا پسند ہندو تنظیموں کی جانب سے ہانیہ عامر کے ساتھ کام کرنے پر مبینہ دھمکیاں موصول ہوئیں، جس کے بعد انہوں نے یہ قدم اٹھایا۔ یاد رہے کہ فلم کی شوٹنگ پاک بھارت کشیدگی سے پہلے مکمل ہو چکی تھی، لیکن حالیہ تناؤ کے بعد فلم میکرز پر دباؤ بڑھا کہ ہانیہ عامر کو فلم سے نکالا جائے، بصورت دیگر فلم کا بائیکاٹ کیا جائے گا۔ تاہم فلم بنانے والوں نے فیصلہ کیا کہ یہ فلم بھارت میں نہیں بلکہ صرف بیرون ممالک میں ریلیز کی جائے گی، اور فلم 27 جون کو ریلیز ہو رہی ہے۔ اس حوالے سے فلم کے مرکزی اداکار دلجیت دوسانجھ نے ایک انٹرویو میں کہا کہ اگر فلم ساز فلم کو دنیا بھر میں ریلیز کرنا چاہتے ہیں تو وہ ان کے ساتھ ہیں، کیونکہ فلم میں بڑی سرمایہ کاری کی گئی ہے۔