وزیراعظم شہباز شریف نے کہا ہے کہ زرعی شعبے میں پائیدار اصلاحات سے نہ صرف ملکی معیشت کو فروغ ملے گا بلکہ دیہی علاقوں اور کسانوں کو بھی براہ راست فائدہ پہنچے گا۔ ان خیالات کا اظہار انہوں نے زرعی شعبے کی ترقی کے حوالے سے ایک اعلیٰ سطحی اجلاس کی صدارت کرتے ہوئے کیا، جس میں وفاقی وزراء، ماہرین، انٹرپرنیورز اور متعلقہ حکام نے شرکت کی۔ اجلاس میں وزیراعظم کو زرعی پیداوار بڑھانے، کسانوں کی مالی معاونت اور زرعی انفراسٹرکچر کی بہتری سے متعلق متعدد تجاویز پیش کی گئیں۔ وزیراعظم شہباز شریف نے اس موقع پر کہا کہ زراعت ملکی معیشت کی ریڑھ کی ہڈی کی حیثیت رکھتی ہے اور حکومت نے بجٹ میں کھاد و زرعی ادویات پر کوئی نیا ٹیکس عائد نہیں کیا تاکہ کسانوں پر مالی بوجھ کم ہو۔ انہوں نے زرعی مشینری پر ٹیکس مرحلہ وار کم کرنے اور اجناس کی اسٹوریج صلاحیت میں اضافہ کرنے کی بھی ہدایت کی۔ بریفنگ میں بتایا گیا کہ “نیشنل ایگریکلچر انوویشن اینڈ گروتھ ایکشن پلان” کے تحت کسانوں کی آمدنی میں اضافہ، ویلیو ایڈیشن اور برآمدات کے ذریعے زرِ مبادلہ حاصل کرنے پر زور دیا جا رہا ہے۔ وزیراعظم نے زرعی اسکالرشپ پر چین جانے والے طلبہ سے بھی امید ظاہر کی کہ وہ وطن واپسی پر زرعی ترقی میں اہم کردار ادا کریں گے۔

دنیا کے طاقتور ترین ڈیجیٹل کیمرے نے کائنات کی پہلی حیرت انگیز تصاویر جاری کر دی ہیں، جن میں چمکتی ہوئی کہکشاؤں، رنگین نیبیولا اور دور دراز ستاروں کو واضح طور پر دیکھا جا سکتا ہے۔ یہ تصاویر ویرا سی روبن آبزرویٹری سے موصول ہوئی ہیں، جس کے بارے میں سائنس دانوں کو توقع ہے کہ یہ مشاہدہ گاہ کائنات کے اسرار کو سمجھنے میں مددگار ثابت ہوگی۔ یہ مشاہدہ گاہ تاریک آسمان کا مسلسل مشاہدہ کرتے ہوئے کائنات کی تاریخ کو ایک ویڈیو کی شکل میں “ریوائنڈ” کر کے دیکھنے کی صلاحیت رکھتی ہے۔ ماہرین فلکیات کا ماننا ہے کہ اس کے ذریعے سیارچوں کی نگرانی، پراسرار ڈارک میٹر کی ماہیت اور کائناتی مظاہر کی گہری تفہیم حاصل کی جا سکے گی۔ ویرا سی روبن کا یہ کیمرا 3200 میگا پکسل پر مشتمل ہے، جو جدید آئی فون کے مقابلے میں 70 گنا زیادہ طاقتور ہے، اور اتنا حساس ہے کہ چاند پر رکھی گئی گالف کی گیند کو بھی دکھا سکتا ہے۔ جاری کی گئی اولین تصاویر کا مقصد کیمرے کی صلاحیت اور تفصیلی فوٹوگرافی کی خصوصیات کو ظاہر کرنا تھا، جو فلکیاتی تحقیق میں ایک بڑا قدم قرار دیا جا رہا ہے۔