معروف اداکارہ اور میزبان متھیرا ایک بار پھر سوشل میڈیا صارفین کی شدید تنقید کا نشانہ بن گئیں۔ ان دنوں متھیرا ایک نجی ٹی وی چینل پر پروگرام کی میزبانی کر رہی ہیں، جس میں وہ سوشل میڈیا سے وابستہ شخصیات کو مدعو کرتی ہیں۔ تاہم حالیہ پروگرام میں ان کے لباس کے انتخاب نے ناظرین کی توجہ حاصل کر لی، اور وہ تنقید کی زد میں آ گئیں۔ پروگرام میں متھیرا نے ایک فٹنگ باڈی کون لباس پہنا، جس میں ان کی ٹانگیں نمایاں دکھائی دے رہی تھیں۔ سوشل میڈیا صارفین نے اسے ٹی وی پروگرام کے لحاظ سے نامناسب اور پاکستانی ثقافت و اسلامی اقدار کے خلاف قرار دیا۔ ایک صارف نے تبصرہ کرتے ہوئے لکھا کہ “اگر یہ پاکستان میں ہو رہا ہے تو استغفراللہ، ہم بیرون ملک رہ کر بھی اپنی اقدار کا خیال رکھتے ہیں۔” کچھ افراد نے حکومت سے اس پر نوٹس لینے کا مطالبہ بھی کیا جبکہ کئی صارفین نے طنزیہ انداز میں تبصرہ کیا کہ “شاید متھیرا پینٹ پہننا بھول گئی تھیں۔” واضح رہے کہ یہ پہلا موقع نہیں جب متھیرا اپنے بولڈ لباس یا انداز کی وجہ سے سوشل میڈیا پر تنقید کا شکار بنی ہوں، اس سے قبل بھی وہ کئی بار اسی طرح کے ردعمل کا سامنا کر چکی ہیں۔

سترہ سالہ سوشل میڈیا انفلوئنسر ثنا یوسف کے لرزہ خیز قتل کیس میں گرفتار ملزم عمر حیات نے عدالت کے سامنے اپنے جرم کا اعتراف کر لیا ہے۔ 22 سالہ عمر حیات کو جوڈیشل مجسٹریٹ سعد نذیر کی عدالت میں پیش کیا گیا، جہاں اس نے تعزیراتِ پاکستان کی دفعہ 164 کے تحت اپنا اعترافی بیان ریکارڈ کروایا۔ ملزم نے بیان دیا کہ وہ ثنا یوسف سے ملاقات کا خواہشمند تھا، لیکن اس کے انکار نے اسے شدید غصے اور انتقام کی آگ میں دھکیل دیا۔ عمر حیات کے مطابق، وہ پہلی بار جب ثنا کے گھر گیا تو وہ دن بھر انتظار کرتا رہا مگر ثنا نے نہ صرف ملاقات سے انکار کیا بلکہ اسے گھر سے واپس جانے کا بھی کہہ دیا، حالانکہ وہ اس کے لیے تحفہ بھی لایا تھا۔ اس انکار نے اس کے جذبات کو مجروح کیا اور جب 2 جون کو دوبارہ ملاقات کی کوشش ناکام ہوئی تو وہ طیش میں آ کر ثنا کے گھر داخل ہوا اور سینے پر دو گولیاں مار کر اسے موت کے گھاٹ اتار دیا۔ یہ افسوسناک واقعہ 2 جون کی شام پیش آیا اور ثنا موقع پر ہی جاں بحق ہو گئی۔ نوجوان انفلوئنسر کے قتل نے سوشل میڈیا پر شدید غم و غصے کی لہر دوڑا دی، جہاں ان کے مداحوں نے نہ صرف افسوس کا اظہار کیا بلکہ مجرم کو سخت ترین سزا دینے کا مطالبہ بھی کیا۔