لاہور: جدید عسکری تقاضوں میں ڈرون ٹیکنالوجی کو بنیادی اہمیت حاصل ہو چکی ہے اور اسی تناظر میں چین کی دو بڑی عسکری کمپنیوں کے اشتراک سے دنیا کا سب سے بڑا ڈرون بردار ایئرکرافٹ ’’Jiu Tian‘‘ تیار کرلیا گیا ہے، جو چینی دفاع کو مزید مضبوط کرے گا۔ اس جدید ایئرکرافٹ کی خاص بات یہ ہے کہ یہ 4,300 میل تک پرواز کرنے کی صلاحیت رکھتا ہے اور فضا میں سے 100 چھوٹے ڈرونز چھوڑنے کی طاقت رکھتا ہے، جن میں خودکش (کامی کا زے) اور مٹرگشت (لوئٹرنگ) ڈرونز شامل ہیں۔

یہ ایئرکرافٹ 11 ٹن وزنی ہے اور اس میں 6 ٹن وزن کے 100 ڈرونز بیک وقت لے جائے جا سکتے ہیں۔ ’’Jiu Tian‘‘ 49 ہزار فٹ کی بلندی پر پرواز کرے گا، جس کی بدولت اسے فضائی حملوں یا دفاعی نظام سے نشانہ بنانا انتہائی مشکل ہوگا۔ اس میں میزائل بھی نصب ہیں، جو اسے دشمن کے اندرونی علاقوں تک پہنچ کر خطرناک اہداف کو نشانہ بنانے کے قابل بناتے ہیں۔

ماہرین عسکریات کے مطابق یہ ڈرون بردار ایئرکرافٹ مستقبل کی جنگوں میں نہ صرف فیصلہ کن کردار ادا کرے گا بلکہ جدید جنگی حکمتِ عملی کا منظرنامہ بھی بدل کر رکھ دے گا۔ ’’Jiu Tian‘‘ کو دشمن کے گہرے علاقوں میں داخل ہو کر ڈرونز کا جھنڈ چھوڑنے اور ٹارگٹ کو مکمل طور پر تباہ کرنے کے لیے تیار کیا گیا ہے، جو کہ ایک بڑی دفاعی پیش رفت ہے۔

خیبرپختونخوا میں سکیورٹی فورسز نے دو مختلف انٹیلی جنس بیسڈ کارروائیوں کے دوران بھارت کی حمایت یافتہ کالعدم تنظیم الخوارج سے تعلق رکھنے والے پانچ دہشت گردوں کو ہلاک کر دیا ہے۔ پاک فوج کے شعبہ تعلقات عامہ (آئی ایس پی آر) کے مطابق، یہ آپریشنز 15 اور 16 جون 2025 کو صوبہ خیبرپختونخوا کے اضلاع پشاور اور شمالی وزیرستان میں کیے گئے۔

پہلی کارروائی ضلع پشاور میں انٹیلی جنس اطلاعات کی بنیاد پر کی گئی، جہاں بھارتی سرپرستی میں سرگرم خوارج کی موجودگی کی تصدیق ہوئی تھی۔ سیکیورٹی فورسز نے محاصرہ کرکے مؤثر طریقے سے آپریشن کیا اور فائرنگ کے شدید تبادلے کے بعد چار خوارج کو ہلاک کر دیا، جن میں خارجی حارث اور خارجی بصیر بھی شامل تھے۔

دوسری کارروائی شمالی وزیرستان میں کی گئی، جہاں ایک اور بھارتی سرپرست دہشت گرد کو فائرنگ کے تبادلے میں جہنم واصل کیا گیا۔ دونوں کارروائیوں کے دوران دہشت گردوں سے بھاری مقدار میں اسلحہ، گولہ بارود اور دھماکہ خیز مواد برآمد کیا گیا، جو ان کے دہشت گردانہ عزائم کی غمازی کرتا ہے۔

آئی ایس پی آر کا کہنا ہے کہ یہ عناصر ملک میں دہشت گردی کی مختلف کارروائیوں میں ملوث رہے ہیں اور سیکیورٹی فورسز دیگر بھارتی حمایت یافتہ دہشت گردوں کے خلاف بھی کارروائیاں جاری رکھے ہوئے ہیں۔ پاکستانی افواج اس عزم کا اعادہ کرتی ہیں کہ ملک سے بھارت کی سرپرستی میں ہونے والی دہشت گردی کا مکمل خاتمہ کیا جائے گا