کامن ویلتھ کی ایک خفیہ اور بعد میں لیک ہونے والی رپورٹ نے انکشاف کیا ہے کہ پاکستان میں 8 فروری 2024 کے عام انتخابات میں منظم دھاندلی اور انسانی و سیاسی حقوق کی سنگین خلاف ورزیاں ہوئیں۔ برطانوی اخبار “دی ٹیلی گراف” کے مطابق، رپورٹ میں کہا گیا ہے کہ فوجی حمایت یافتہ حکومت نے انتخابی عمل میں مداخلت کرتے ہوئے پاکستان تحریکِ انصاف (پی ٹی آئی) کے امیدواروں کو غیر منصفانہ طریقے سے محدود کیا، ان پر انتخابی نشان کے استعمال پر پابندی لگائی گئی اور انہیں آزاد حیثیت میں حصہ لینے پر مجبور کیا گیا۔

رپورٹ کے مطابق کئی پولنگ سٹیشنوں پر اصل نتائج کے فارم اور جاری کردہ حتمی نتائج کے فارموں میں واضح فرق تھا، جس سے ظاہر ہوتا ہے کہ کچھ امیدواروں کو غیر قانونی طور پر کامیاب قرار دیا گیا۔ مبصرین کی 13 رکنی ٹیم نے اس انتخابی عمل کا مشاہدہ کیا، مگر کامن ویلتھ نے پہلی بار اپنی تاریخ میں رپورٹ کو شائع نہیں کیا۔ رپورٹ پہلے حکومت پاکستان کو غیر رسمی طور پر دی گئی تھی، جس پر مبینہ طور پر حکومت نے اس کی اشاعت روکنے کا مطالبہ کیا، اور دولتِ مشترکہ سیکریٹریٹ نے یہ مطالبہ مان لیا۔

رپورٹ میں آزادی اظہار، اجتماع اور انجمن سازی پر پابندیوں کا بھی ذکر ہے۔ اس کے علاوہ یہ بھی بتایا گیا ہے کہ کس طرح ریاستی مشینری کا استعمال کرتے ہوئے عمران خان کی غیر موجودگی میں ان کی جماعت کو سیاسی عمل سے باہر رکھا گیا۔ دولتِ مشترکہ کے ترجمان نے ردعمل میں کہا ہے کہ وہ آن لائن گردش کرنے والی رپورٹ سے واقف ہیں لیکن اصولی طور پر لیک شدہ دستاویزات پر تبصرہ نہیں کرتے۔ ان کے مطابق، رپورٹ حکومت پاکستان اور الیکشن کمیشن کو پہلے ہی فراہم کی جا چکی ہے اور یہ جلد باقاعدہ طور پر شائع کی جائے گی۔

امیر جماعت اسلامی پاکستان حافظ نعیم الرحمن نے ملائیشیا میں ہونے والی مسلم امہ انٹرنیشنل فورم 2025 (MUNIF) سے خطاب کرتے ہوئے اسلامی دنیا کے حکمرانوں پر زور دیا کہ وہ غزہ میں اسرائیلی جارحیت روکنے کے لیے محض بیانات کے بجائے عملی اقدامات کریں۔ 71ویں سالانہ موتمر کانفرنس میں مہمان خصوصی کی حیثیت سے خطاب کرتے ہوئے انہوں نے کہا کہ امت مسلمہ کو اتحاد، معاشی و تجارتی تعاون اور نوجوان نسل کے تبادلے جیسے اقدامات کے ذریعے مضبوط کیا جا سکتا ہے۔ حافظ نعیم کا کہنا تھا کہ اسلامی دنیا تعلیم اور ٹیکنالوجی کے میدان میں ترقی کیے بغیر اپنا کھویا ہوا مقام حاصل نہیں کر سکتی۔ انہوں نے استعماری قوتوں، خصوصاً امریکہ کی جانب اشارہ کرتے ہوئے کہا کہ یہ طاقتیں اسلامی ممالک کے وسائل پر قابض ہیں اور ان سے نجات ناگزیر ہے۔

کانفرنس میں دنیا بھر سے اسلامی تحریکوں کے قائدین، علماء اور دانشور شریک ہوئے جن میں نائب امیر جماعت اسلامی بنگلہ دیش پروفیسر مجیب الرحمن، نائب امیر جماعت اسلامی پاکستان ڈاکٹر عطاء الرحمن سمیت دیگر رہنما شامل تھے۔ اس موقع پر حافظ نعیم الرحمن نے ملائیشین اسلامی پارٹی (PAS) کے قائد اور معروف اسلامی سکالر عبدالہادی اواغ سے بھی ملاقات کی، جس میں فلسطین، جنوبی ایشیا اور جنوب مشرقی ایشیائی خطے کے مسائل پر تفصیلی گفتگو کی گئی۔ دونوں رہنماؤں نے اسلامی تحریکوں کے درمیان ہم آہنگی، امن اور ترقی کے لیے جدوجہد تیز کرنے پر اتفاق کیا۔ حافظ نعیم نے خاص طور پر نوجوانوں کے درمیان روابط بڑھانے کی ضرورت پر بھی زور دیا۔ اس موقع پر انہوں نے اسلامک سرکل آف ملائیشیا (ICM) کے رہنماؤں سے بھی ملاقاتیں کیں اور باہمی دلچسپی کے امور پر تبادلہ خیال کیا۔