لاہور کی کینٹ کچہری میں اداکارہ نازش جہانگیر کے خلاف استغاثہ کیس کی سماعت ہوئی، جس میں عدالت نے اداکارہ کو آئندہ سماعت پر پیش ہونے کا حکم دیا۔ سماعت کے دوران اداکارہ نازش جہانگیر کے وکیل نے عدالت میں حاضری سے استثنیٰ کی درخواست دائر کی، جس میں مؤقف اختیار کیا گیا کہ اداکارہ کی طبیعت ناساز ہے اور وہ اسپتال میں داخل ہیں، لہٰذا انہیں حاضری سے ایک روز کی مہلت دی جائے۔ عدالت نے درخواست منظور کرتے ہوئے صرف ایک دن کی حاضری معافی دی اور ساتھ ہی اگلی سماعت پر اداکارہ کی بیماری کا اصل میڈیکل سرٹیفکیٹ بھی طلب کر لیا۔ کیس کی سماعت جوڈیشل مجسٹریٹ کی عدالت میں ہوئی، جہاں اداکار اسود کی جانب سے ایڈووکیٹ چوہدری بابر پیش ہوئے۔ استغاثہ میں مؤقف اختیار کیا گیا کہ نازش جہانگیر نے رقم وصول کی لیکن واپس نہیں کی، جو امانت میں خیانت کے زمرے میں آتا ہے۔ عدالت سے استدعا کی گئی کہ اداکارہ کے خلاف امانت میں خیانت سمیت دیگر متعلقہ دفعات کے تحت قانونی کارروائی کا حکم دیا جائے۔

پاکستان میں تعینات ایرانی سفیر رضا امیری مقدم نے کہا ہے کہ صیہونی حکومت نے ایران پر ایک ناحق اور جارحانہ جنگ مسلط کی، جس کے خلاف ایران نے عظیم اور باوقار فتح حاصل کی، جو امت مسلمہ کے لیے فخر اور سچ کی جیت ہے۔ اپنے ایک بیان میں انہوں نے کہا کہ ایران یہ تاریخی فتح مناتے ہوئے پاکستان کے اصولی اور جرات مندانہ مؤقف کو قدر کی نگاہ سے دیکھتا ہے۔ انہوں نے صدر پاکستان، وزیراعظم اور فیلڈ مارشل سید عاصم منیر کا خصوصی شکریہ ادا کرتے ہوئے کہا کہ ایران اور پاکستان ہمیشہ یکجہتی، بھائی چارے اور باہمی احترام کے رشتے میں بندھے رہے ہیں، اور ایرانی قوم پاکستان کی حمایت کو کبھی فراموش نہیں کرے گی۔
اس موقع پر وزیراعظم شہباز شریف سے ایرانی سفیر نے اہم ملاقات بھی کی، جس میں خطے میں امن و استحکام، ایران اسرائیل کشیدگی اور موجودہ جغرافیائی و سیاسی صورتحال پر تفصیلی تبادلہ خیال کیا گیا۔ ملاقات کے دوران ایرانی سفیر نے وزیراعظم کو ایران کے مؤقف سے آگاہ کرتے ہوئے کہا کہ ایران کی جانب سے خطے میں امن کی بحالی کے لیے سفارتی ذرائع کو اہمیت دی جا رہی ہے۔ وزیراعظم شہباز شریف نے بھی پاکستان کے اصولی مؤقف کا اعادہ کرتے ہوئے کہا کہ خطے میں کسی قسم کی کشیدگی کا خاتمہ صرف اور صرف مذاکرات اور سفارتی تدابیر کے ذریعے ممکن ہے، اور پاکستان ہمیشہ امن و استحکام کے لیے اپنا مثبت کردار ادا کرتا رہے گا