پاکستانی فلم انڈسٹری کی معروف اداکارہ خوشبو نے پہلی بار اپنے اور ارباز خان کے تعلقات پر کھل کر بات کرتے ہوئے ان سے علیحدگی کی تصدیق کر دی ہے۔ ایک حالیہ انٹرویو میں خوشبو نے سابق شوہر پر دھوکہ دہی کا الزام عائد کرتے ہوئے کہا کہ ارباز ان کی زندگی کا اہم ترین حصہ تھے، مگر وہ مشکل وقت میں ان کے ساتھ کھڑے نہ ہوئے۔ اداکارہ نے انکشاف کیا کہ دونوں کے درمیان کوئی لڑائی یا تنازع نہیں ہوا، بلکہ ارباز خان اچانک بغیر کسی اطلاع کے چلے گئے اور پانچ سال گزرنے کے باوجود واپس نہیں آئے۔

اداکارہ نے جذباتی انداز میں بتایا کہ آج بھی وہ ارباز کی یادوں میں زندہ ہیں اور یہ سمجھنے سے قاصر ہیں کہ انہوں نے اچانک خاندان کو کیوں چھوڑا۔ ان کا کہنا تھا کہ اگر وہ محض ایک روایتی گھریلو خاتون ہوتیں تو شاید حالات مختلف ہوتے، مگر انہوں نے زندگی بھر گھریلو ذمے داریاں اور اپنے فرائض دل و جان سے نبھائے۔ انہوں نے شکوہ کیا کہ وہ پچھلے چھ ماہ سے گھر پر موجود ہیں، لیکن کسی نے پلٹ کر ان کی خبر تک نہیں لی۔

خوشبو نے مزید بتایا کہ ان کے دونوں بیٹے گزشتہ پانچ برس سے ان کے ساتھ ہیں، جبکہ ارباز خان سے ان کی مکمل علیحدگی ہوچکی ہے۔ اگرچہ اداکارہ نے براہِ راست “طلاق” کا لفظ استعمال نہیں کیا، تاہم انہوں نے رشتے کے ختم ہونے کا اعتراف واضح طور پر کر دیا۔

یاد رہے کہ خوشبو اور اداکار ارباز خان نے سال 2000 میں شادی کی تھی اور ان کے دو بیٹے ہیں۔ اس سے قبل پشتو فلم انڈسٹری کے سینئر اداکار اور ارباز کے والد، آصف خان نے بھی ایک انٹرویو میں شکوہ کیا تھا کہ انہیں پانچ برس سے اپنے بیٹے اور بہو سے ملاقات کا موقع نہیں ملا، جو اس خاندانی کشیدگی کی ایک اور تصدیق سمجھی جا رہی ہے۔

بالی ووڈ کی معروف اداکارہ اور ماڈل تنوشری دتّا نے انکشاف کیا ہے کہ انہیں گزشتہ 11 برسوں سے ریئلٹی شو “بگ باس” میں شرکت کی مسلسل آفرز موصول ہو رہی ہیں، تاہم وہ ہر بار انکار کر دیتی ہیں۔ ایک حالیہ انٹرویو میں گفتگو کرتے ہوئے تنوشری دتّا، جنہوں نے عمران ہاشمی کے ساتھ فلم عاشق بنایا آپ نے سے شہرت حاصل کی، بتایا کہ انہیں شو میں بطور امیدوار شامل ہونے کے لیے 1 کروڑ 65 لاکھ بھارتی روپے تک کی پیشکش ہوئی، لیکن انہوں نے اسے اپنی شخصیت اور اقدار سے متصادم سمجھتے ہوئے قبول کرنے سے انکار کر دیا۔

اداکارہ کا کہنا تھا کہ وہ اپنی عزتِ نفس، نجی زندگی اور نظریات کو دولت پر ترجیح دیتی ہیں۔ انہوں نے واضح الفاظ میں کہا، “اگر بگ باس والے مجھے چاند کا ٹکڑا بھی دے دیں، تب بھی میں اس شو کا حصہ نہ بنوں۔” تنوشری نے بگ باس کے فارمیٹ پر تنقید کرتے ہوئے کہا کہ “اس شو میں مرد و خواتین ایک ہی جگہ سوتے ہیں، دن بھر جھگڑتے رہتے ہیں، اور یہ سب کچھ میرے لیے ناقابل قبول ہے۔”

ان کا یہ بیان سوشل میڈیا پر بھی توجہ حاصل کر رہا ہے، جہاں صارفین ان کی خودداری کو سراہ رہے ہیں، جبکہ کچھ بگ باس کے فارمیٹ پر تنقید بھی کر رہے ہیں۔