اسلام آباد:
وفاقی حکومت سیلاب متاثرین کی بحالی کے لیے ایک نئے منی بجٹ لانے پر غور کر رہی ہے، جس کا مقصد امیر طبقے سے اضافی ٹیکسز کی صورت میں محصولات جمع کرنا ہے۔ ذرائع کے مطابق، حکومت کی منصوبہ بندی ہے کہ مہنگی الیکٹرانک اشیا، سگریٹ، بڑی گاڑیاں اور درآمدی سامان پر فیڈرل لیوی عائد کی جائے تاکہ کم از کم 50 ارب روپے اضافی آمدنی حاصل کی جا سکے۔ اگر وزیراعظم شہباز شریف اس تجویز کی منظوری دے دیتے ہیں تو یہ منی بجٹ جلد نافذ کیا جا سکتا ہے۔

وزیر خزانہ محمد اورنگزیب کی زیر صدارت ہونے والے حالیہ اجلاس میں اس مجوزہ منصوبے پر غور کیا گیا، جس میں سگریٹ کے ہر پیکٹ پر 50 روپے لیوی، مہنگے الیکٹرانک سامان پر 5 فیصد لیوی اور 1800 سی سی یا اس سے بڑی گاڑیوں پر بھی نیا ٹیکس عائد کرنے کی تجاویز شامل تھیں۔ اس کے علاوہ، ان 1,100 سے زائد درآمدی اشیا پر بھی لیوی لگائی جائے گی جن پر حالیہ بجٹ میں ریگولیٹری ڈیوٹی کم کی گئی تھی۔

یہ لیوی ایف بی آر کے روایتی ٹیکس نظام کا حصہ نہیں ہوگی بلکہ غیر ٹیکس آمدنی کے ذریعے حکومت کو ریونیو حاصل ہوگا تاکہ ٹیکس خسارے کو پورا کیا جا سکے۔ یاد رہے کہ جولائی سے اگست کے دوران 40 ارب روپے کا ٹیکس خسارہ سامنے آ چکا ہے جو ستمبر کے آخر تک 100 ارب روپے تک پہنچنے کا امکان ہے۔ حکومت کی جانب سے اس اقدام کے ذریعے نہ صرف سیلاب سے متاثرہ علاقوں میں فنڈز کی فراہمی ممکن ہو سکے گی بلکہ معیشت میں موجود مالیاتی دباؤ کو بھی کم کیا جا سکے گا۔ تاہم اس تجویز پر حتمی فیصلہ آئندہ دنوں میں متوقع ہے۔

پنجاب حکومت نے سابق وزیراعظم عمران خان کے خلاف جی ایچ کیو حملہ کیس میں جیل ٹرائل کا نوٹیفکیشن واپس لے لیا ہے، جس کے بعد اب اس کیس سمیت 9 مئی کے مقدمات کی سماعت انسداد دہشت گردی عدالت (اے ٹی سی) راولپنڈی میں ہوگی۔

سرکاری ذرائع کے مطابق نیا نوٹیفکیشن جاری کر دیا گیا ہے، جس کے تحت عمران کو آئندہ سماعتوں میں ویڈیو لنک کے ذریعے پیش کیا جائے گا۔ دیگر ملزمان کو عدالت میں ذاتی حیثیت میں پیش ہونا ہوگا۔

عدالت میں میڈیا سے گفتگو کرتے ہوئے عمران خان کے وکیل فیصل ملک نے کہا کہ “آج 9 مئی کے 12 مقدمات کی سماعت تھی، جس میں جی ایچ کیو حملہ کیس سمیت تمام مقدمات کی سماعت یکم اکتوبر تک ملتوی کر دی گئی ہے۔”

ان کا مزید کہنا تھا کہ عدالت کو بتایا گیا ہے کہ “ایک نیا نوٹیفکیشن جاری ہوا ہے، جس کے تحت کیس اڈیالہ جیل سے واپس اے ٹی سی راولپنڈی منتقل کر دیا گیا ہے اور عمران خان کو ویڈیو لنک کے ذریعے پیش کیا جائے گا۔”

فیصل ملک نے پنجاب حکومت کے فیصلے پر اعتراض اٹھاتے ہوئے کہا کہ “ہم ویڈیو لنک کے فیصلے کو مسترد کرتے ہیں اور عمران خان کی عدالت میں ذاتی پیشی کے لیے درخواست دائر کریں گے۔”

اس معاملے پر عدالتی رپورٹر دُرّے اقبال نے تبصرہ کرتے ہوئے کہا کہ “عمران کی جیل میں ہونے والی ملاقاتیں اور بیانات روکنے کے لیے پنجاب حکومت نے یہ نوٹیفکیشن واپس لیا ہے، اور اب حکومت چاہتی ہے کہ عمران خان کی عدالت تک رسائی محدود رہے۔”