فٹبال اسٹار کرسٹیانو رونالڈو اور ان کی دیرینہ ساتھی جیورجینا راڈریگز نے باضابطہ طور پر منگنی کی تصدیق کر دی ہے۔ جیورجینا نے سوشل میڈیا پر ہیرے سے جڑی انگوٹھی کی تصویر شیئر کرتے ہوئے کیپشن میں لکھا:

“اس زندگی اور آنے والی زندگی میں مجھے آپ قبول ہوں”۔ دنیا بھر سے مداحوں نے اس خبر پر جوڑے کو مبارکباد کے پیغامات بھیجے۔ خیال رہے کہ رونالڈو اور جیورجینا 2017 سے ایک ساتھ رہ رہے ہیں اور ان کے ہاں دو بیٹیوں کی پیدائش ہو چکی ہے۔

ترک کوہ پیما گل نور تمبت نے تاریخ رقم کرتے ہوئے دنیا کی دوسری بلند ترین چوٹی ’’کے ٹو‘‘ سر کر لی اور یہ اعزاز حاصل کرنے والی پہلی ترک خاتون بن گئیں۔ وہ رواں سال جون میں پاکستان پہنچی تھیں اور جولائی میں سخت موسمی حالات کے باعث کئی کوہ پیماؤں کی بیس کیمپ سے واپسی کے باوجود اپنے مشن پر قائم رہیں۔

ترچ میر کی چوٹیوں کو سر کرنے کے بعد انہوں نے 11 اگست کو شام 4 بجے ’’کے ٹو‘‘ کی چوٹی پر کامیابی سے قدم رکھا۔ گل نور نے انسٹاگرام پر اپنی کامیابی کی اطلاع دیتے ہوئے چوٹی پر کھنچوائی گئی تصویر شیئر کی اور اپنی ٹیم کا شکریہ ادا کیا۔ وہ اس سے قبل نیپال کی جانب سے ماؤنٹ ایورسٹ سر کرنے والی پہلی ترک خاتون کا اعزاز بھی حاصل کر چکی ہیں۔