سپیکر پنجاب اسمبلی اور مسلم لیگ ن کے رہنما ملک محمد احمد خان نے پریس کانفرنس میں اعلان کیا ہے کہ پاکستان تحریک انصاف کے 26 اراکین کے خلاف آج ہی ریفرنس الیکشن کمیشن کو بھیجا جائے گا۔ سپیکر پنجاب اسمبلی نے الزام لگایا کہ ایوان میں مسلسل غنڈہ گردی کی جا رہی ہے اور 50 سے 60 ارکان حکومتی بینچوں پر حملہ آور ہو رہے ہیں، جو پارلیمانی اقدار کی سنگین خلاف ورزی ہے۔ سپیکر نے کہا کہ اپوزیشن لیڈر نے خود نشاندہی کی ہے کہ بعض ارکان اپنے پارلیمانی لیڈر کی ہدایات کو نہیں مان رہے، جو آئین اور اسمبلی قواعد کی خلاف ورزی ہے۔ انہوں نے واضح کیا کہ ایسے ارکان کے خلاف کارروائی اسمبلی قوانین کے تحت متعلقہ فورمز پر کی جائے گی کیونکہ اسمبلی کے وقار اور جمہوری اصولوں کا تحفظ ضروری ہے۔

انہوں نے پی ٹی آئی پر 2014 میں بھی جمہوری عمل کو نقصان پہنچانے کا الزام عائد کیا اور کہا کہ ایک بار پھر ایوان کو یرغمال بنانے کی کوشش کی جا رہی ہے، لیکن پنجاب اسمبلی میں حکومت کو واضح اکثریت حاصل ہے اور چند افراد کی ہنگامہ آرائی سے نظام کو مفلوج نہیں ہونے دیا جائے گا۔ سپیکر نے یہ بھی بتایا کہ پنجاب اسمبلی میں 37 انتخابی عذرداریاں زیر سماعت ہیں جو ضابطے کے مطابق حل کی جا رہی ہیں، مگر اپوزیشن نے ایوان میں دیے گئے بھرپور وقت کا جواب انتشار اور بدتمیزی سے دیا۔ انہوں نے پی ٹی آئی سے سوال کیا کہ کور کمانڈر ہاؤس اور ریڈیو پاکستان کو آگ لگانے، میانوالی جیل سے قیدیوں کے فرار، عدالتوں پر حملے اور وفاق پر مسلح قافلے کے ساتھ چڑھائی کرنے کے ذمہ دار آخر کون تھے؟

وزیراعظم شہباز شریف نے مخصوص نشستوں سے متعلق سپریم کورٹ کے آئینی بینچ کے حالیہ فیصلے کا خیرمقدم کرتے ہوئے اسے آئین و قانون کی بالادستی اور قانونی شفافیت کی فتح قرار دیا ہے۔ اپنے بیان میں وزیراعظم نے قانونی ٹیم کو مبارکباد دی اور ان کی محنت کو سراہتے ہوئے کہا کہ یہ فیصلہ نہ صرف آئینی عمل بلکہ جمہوری اقدار کے تحفظ کی علامت ہے۔ ان کے مطابق اس فیصلے سے قانون کی درست تشریح سامنے آئی ہے اور یہ ملک میں آئینی استحکام کی طرف ایک اہم قدم ہے۔ وزیراعظم نے اپوزیشن سے اپیل کی کہ وہ ملک کی ترقی اور خوشحالی کے لیے مثبت کردار ادا کرے۔

دوسری جانب پاکستان تحریک انصاف نے سپریم کورٹ کے فیصلے پر شدید ردعمل دیا ہے اور اسے اپنے آئینی حق پر عدالتی ڈاکہ قرار دیا ہے۔ پارٹی ترجمان نے کہا کہ جس دیدہ دلیری سے پی ٹی آئی کی مخصوص نشستیں چھینی گئیں اور انہیں دیگر جماعتوں میں بانٹا گیا جنہیں عوام نے مسترد کیا، وہ جمہوریت کے اصولوں کی نفی ہے۔ تحریک انصاف نے ماضی کی عدالتی نظیروں کی جانب اشارہ کرتے ہوئے کہا کہ انہی عدالتوں نے پہلے پی ٹی آئی کا استحقاق تسلیم کیا تھا، لیکن اب فیصلے انصاف اور آئین کی روح کے خلاف آئے ہیں۔ ترجمان نے الزام لگایا کہ تحریک انصاف کو ریاستی جبر کا سامنا ہے، الیکشن چوری کیے گئے، پارٹی نشان چھینا گیا، کارکنوں کو اغوا کیا گیا، میڈیا پر پابندیاں لگیں اور عمران خان کو سیاسی انتقام کا نشانہ بنایا گیا۔ ان کا کہنا تھا کہ یہ نظام اب عوامی یا آئینی نہیں رہا اور پی ٹی آئی عوامی امید اور عمران خان کی قیادت پر یقین رکھتے ہوئے اپنی جدوجہد جاری رکھے گی، کیونکہ ان کے مطابق آخری فتح حق، آئین اور عمران خان کی ہی ہوگی۔