اسلام آباد:
پولینڈ نے پاکستان میں توانائی کے شعبے، خاص طور پر تیل و گیس کے شعبے میں سرمایہ کاری بڑھانے اور دوطرفہ اقتصادی تعلقات کو مزید مضبوط بنانے کا اعلان کیا ہے۔ اس سلسلے میں پولینڈ کے سفیر میسیج پسارسکی اور پاکستان کے وزیر خزانہ محمد اورنگزیب کے درمیان اہم ملاقات ہوئی، جس میں مختلف اقتصادی امور پر تبادلہ خیال کیا گیا۔

پولینڈ کے سفیر کے مطابق ان کا ملک پاکستان میں تیل و گیس کے شعبے میں 100 ملین ڈالر سے زائد کی سرمایہ کاری میں دلچسپی رکھتا ہے، اور دونوں ممالک کے درمیان اس شعبے میں شراکت داری کو مزید وسعت دینے کے امکانات روشن ہیں۔ انہوں نے مزید کہا کہ پولینڈ نہ صرف توانائی بلکہ دیگر معاشی شعبوں میں بھی تعاون کا خواہاں ہے۔

سفیر نے اعلان کیا کہ پولینڈ، پاکستان کے ساتھ تعلقات کو مزید فروغ دینے کے لیے جلد ہی ایک اعلیٰ سطحی سیاسی وفد پاکستان بھیجے گا۔ یہ اقدام سیلاب متاثرین کے لیے پولینڈ کی جانب سے کی گئی امدادی سرگرمیوں کے تسلسل کا حصہ ہے۔

اس ملاقات اور فیصلوں کو ایس آئی ایف سی (Special Investment Facilitation Council) کی کوششوں کا نتیجہ قرار دیا جا رہا ہے، جس کے تحت پاکستان میں غیر ملکی سرمایہ کاری کے دروازے کھولے جا رہے ہیں۔ توقع کی جا رہی ہے کہ مستقبل قریب میں پاکستان اور پول کے درمیان تجارتی و اقتصادی تعاون نئی بلندیوں کو چھوئے گا۔

اسلام آباد:
وفاقی حکومت سیلاب متاثرین کی بحالی کے لیے ایک نئے منی بجٹ لانے پر غور کر رہی ہے، جس کا مقصد امیر طبقے سے اضافی ٹیکسز کی صورت میں محصولات جمع کرنا ہے۔ ذرائع کے مطابق، حکومت کی منصوبہ بندی ہے کہ مہنگی الیکٹرانک اشیا، سگریٹ، بڑی گاڑیاں اور درآمدی سامان پر فیڈرل لیوی عائد کی جائے تاکہ کم از کم 50 ارب روپے اضافی آمدنی حاصل کی جا سکے۔ اگر وزیراعظم شہباز شریف اس تجویز کی منظوری دے دیتے ہیں تو یہ منی بجٹ جلد نافذ کیا جا سکتا ہے۔

وزیر خزانہ محمد اورنگزیب کی زیر صدارت ہونے والے حالیہ اجلاس میں اس مجوزہ منصوبے پر غور کیا گیا، جس میں سگریٹ کے ہر پیکٹ پر 50 روپے لیوی، مہنگے الیکٹرانک سامان پر 5 فیصد لیوی اور 1800 سی سی یا اس سے بڑی گاڑیوں پر بھی نیا ٹیکس عائد کرنے کی تجاویز شامل تھیں۔ اس کے علاوہ، ان 1,100 سے زائد درآمدی اشیا پر بھی لیوی لگائی جائے گی جن پر حالیہ بجٹ میں ریگولیٹری ڈیوٹی کم کی گئی تھی۔

یہ لیوی ایف بی آر کے روایتی ٹیکس نظام کا حصہ نہیں ہوگی بلکہ غیر ٹیکس آمدنی کے ذریعے حکومت کو ریونیو حاصل ہوگا تاکہ ٹیکس خسارے کو پورا کیا جا سکے۔ یاد رہے کہ جولائی سے اگست کے دوران 40 ارب روپے کا ٹیکس خسارہ سامنے آ چکا ہے جو ستمبر کے آخر تک 100 ارب روپے تک پہنچنے کا امکان ہے۔ حکومت کی جانب سے اس اقدام کے ذریعے نہ صرف سیلاب سے متاثرہ علاقوں میں فنڈز کی فراہمی ممکن ہو سکے گی بلکہ معیشت میں موجود مالیاتی دباؤ کو بھی کم کیا جا سکے گا۔ تاہم اس تجویز پر حتمی فیصلہ آئندہ دنوں میں متوقع ہے۔