بھارتی پنجابی اداکارہ نیرو باجوہ نے اپنی نئی فلم ’سردار جی 3‘ میں پاکستانی اداکارہ ہانیہ عامر کے ساتھ کام کرنے کے باوجود انہیں انسٹاگرام پر ان فالو کر دیا ہے، جبکہ فلم سے متعلق تمام پروموشنل پوسٹس بھی سوشل میڈیا سے ہٹا دی گئی ہیں۔ اس غیر متوقع اقدام نے سوشل میڈیا صارفین میں تشویش کی لہر دوڑا دی ہے اور مختلف قیاس آرائیاں جنم لے رہی ہیں۔ کچھ اطلاعات کے مطابق نیرو باجوہ کو انتہا پسند ہندو تنظیموں کی جانب سے ہانیہ عامر کے ساتھ کام کرنے پر مبینہ دھمکیاں موصول ہوئیں، جس کے بعد انہوں نے یہ قدم اٹھایا۔ یاد رہے کہ فلم کی شوٹنگ پاک بھارت کشیدگی سے پہلے مکمل ہو چکی تھی، لیکن حالیہ تناؤ کے بعد فلم میکرز پر دباؤ بڑھا کہ ہانیہ عامر کو فلم سے نکالا جائے، بصورت دیگر فلم کا بائیکاٹ کیا جائے گا۔ تاہم فلم بنانے والوں نے فیصلہ کیا کہ یہ فلم بھارت میں نہیں بلکہ صرف بیرون ممالک میں ریلیز کی جائے گی، اور فلم 27 جون کو ریلیز ہو رہی ہے۔ اس حوالے سے فلم کے مرکزی اداکار دلجیت دوسانجھ نے ایک انٹرویو میں کہا کہ اگر فلم ساز فلم کو دنیا بھر میں ریلیز کرنا چاہتے ہیں تو وہ ان کے ساتھ ہیں، کیونکہ فلم میں بڑی سرمایہ کاری کی گئی ہے۔

پاکستانی اداکارہ مہوش حیات کی بہن افشین حیات نے بھی شوبز انڈسٹری میں باضابطہ قدم رکھ لیا ہے اور حالیہ دنوں وہ ڈرامہ سیریل “ڈائن” میں اپنے منفی کردار کے باعث توجہ کا مرکز بنی ہوئی ہیں۔

افشین حیات نے ایک انٹرویو میں بتایا کہ وہ کئی سالوں سے میوزک انڈسٹری سے وابستہ ہیں، لیکن اب وہ اداکاری کے میدان میں بھی اپنی شناخت بنانے کے لیے سرگرم ہیں۔ ان کا کہنا تھا کہ وہ اس سے قبل بھی کچھ ڈراموں میں سپورٹنگ رولز کر چکی ہیں، لیکن “ڈائن” نے انہیں اپنی صلاحیتیں دکھانے کا حقیقی موقع فراہم کیا، جس کے بعد وہ باقاعدگی سے اسکرین پر آنے کی خواہشمند ہیں۔

انہوں نے مزید بتایا کہ وہ تھیٹر میں بھی طویل عرصے سے سرگرم رہی ہیں اور معروف اداکار یاسر حسین کے ساتھ بھی اسٹیج پرفارمنس کر چکی ہیں۔

دلچسپ بات یہ ہے کہ ڈرامہ “ڈائن” میں مہوش حیات اور افشین حیات دونوں بہنیں اداکاری کے جوہر دکھا رہی ہیں، لیکن زیادہ تر ناظرین اس بات سے بےخبر ہیں کہ اسکرین پر ایک ساتھ موجود ان دو اداکاراؤں کا رشتہ بھی خونی ہے۔