وزیراعظم محمد شہباز شریف کی زیرِ صدارت افغان پناہ گزینوں کی وطن واپسی کے حوالے سے ایک اعلیٰ سطح اجلاس منعقد ہوا۔ اجلاس میں فیلڈ مارشل سید عاصم منیر چیف آف آرمی اسٹاف، وفاقی وزراء، آزاد جموں و کشمیر، پنجاب، سندھ، بلوچستان، گلگت بلتستان کے وزرائے اعلیٰ اور خیبر پختونخوا کے نمائندے شریک ہوئے۔ وزیراعظم نے اجلاس کے شرکاء کا خیرمقدم کرتے ہوئے کہا کہ وفاق تمام صوبوں کے ساتھ مکمل تعاون کے لیے پرعزم ہے۔

انہوں نے واضح کیا کہ پاکستان نے سفارتی اور سیاسی سطح پر افغانستان کو خوارج کی دراندازی روکنے کے لیے قائل کرنے کی بھرپور کوشش کی ہے۔

اجلاس میں بریفنگ دی گئی کہ 16 اکتوبر 2025 تک 14 لاکھ 77 ہزار 592 افغان پناہ گزینوں کو وطن واپس بھیجا جا چکا ہے۔ غیر قانونی طور پر مقیم افغان باشندوں کو کسی بھی قسم کی اضافی مہلت نہیں دی جائے گی، اور صرف وہی افراد پاکستان میں رہ سکیں گے جن کے پاس قانونی ویزہ ہوگا۔ ۔

انہوں نے اس موقع پر افواجِ پاکستان کی بہادری کو سراہتے ہوئے کہا کہ فیلڈ مارشل سید عاصم منیر کی قیادت میں پاک فوج نے افغان حملوں کو پسپا کر کے وطن کا دفاع کیا۔

اجلاس کے اختتام پر فیصلہ کیا گیا کہ افغان پناہ گزینوں کی وطن واپسی سے متعلق تمام سفارشات پر سختی سے عمل کیا جائے گا اور وفاق صوبوں کے ساتھ مکمل تعاون جاری رکھے گا۔

صوبہ خیبرپختونخوا کے ضلع بنوں کے مغل کوٹ سیکٹر میں سکیورٹی فورسز نے فتنۃ الخوارج کے دہشتگردوں کے خلاف کامیاب انٹیلی جنس بیسڈ آپریشن کیا۔ کارروائی کے دوران فتنۃ الخوارج کے طارق کچھی گروپ کو مؤثر انداز میں نشانہ بنایا گیا، جس کے نتیجے میں گروپ کا سرغنہ طارق کچھی اور اس کا ساتھی حکیم اللہ عرف ٹائیگر ہلاک ہوگئے۔ سکیورٹی ذرائع کے مطابق مارے گئے دہشتگردوں سے بھاری اسلحہ برآمد کیا گیا۔ طارق کچھی گروپ گزشتہ دو سال سے دہشتگردانہ کارروائیوں اور طالبان کے لیے بھتہ خوری میں سرگرم تھا اور افغانستان سے پاکستان میں دراندازی کا سہولت کار سمجھا جاتا تھا۔

دوسری جانب ضلع بنوں کے تھانہ ہوید کی حدود چوکی مزانگہ پر فتنۃ الخوارج کے دہشتگردوں کی جانب سے بارودی مواد سے بھرا رکشہ لے کر حملے کی کوشش کی گئی، تاہم پولیس کے بہادر جوانوں نے بروقت کارروائی کرتے ہوئے حملہ ناکام بنا دیا۔ پولیس کی فائرنگ سے رکشہ زوردار دھماکے سے پھٹ گیا، جس میں تینوں دہشتگرد موقع پر ہی ہلاک ہوگئے۔ واقعے میں تمام پولیس اہلکار محفوظ رہے، البتہ دھماکے کی شدت سے قریبی گھروں کو معمولی نقصان پہنچا۔