پاکستان میں سائنس اور ٹیکنالوجی کے شعبے میں خدمات انجام دینے والے ماہرین کی حوصلہ افزائی کے لیے صدارتی ایوارڈز اور قومی اعزازات دینے کی تیاریاں جاری ہیں۔ اس سلسلے میں وفاقی وزیر سائنس و ٹیکنالوجی خالد حسین مگسی کی زیر صدارت ایک اہم اجلاس منعقد ہوا، جس میں مختلف شعبوں میں نمایاں کارکردگی دکھانے والے ماہرین کے ناموں پر مشاورت کی گئی۔ اجلاس میں سائنس، ٹیکنالوجی، انجینئرنگ اور تعلیم جیسے اہم شعبوں میں خدمات انجام دینے والوں کو نامزد کرنے پر غور کیا گیا۔ وفاقی وزیر کا کہنا تھا کہ پاکستان کے سائنسدان عالمی معیار پر پورا اترتے ہیں اور حکومت ان کی حوصلہ افزائی کے لیے پرعزم ہے۔ انہوں نے واضح کیا کہ وزارت سائنس و ٹیکنالوجی کی جانب سے میرٹ اور شفافیت کو مدنظر رکھتے ہوئے یہ عمل جاری ہے تاکہ باصلاحیت پاکستانیوں کو ان کی خدمات کا صلہ دیا جا سکے۔ خالد مگسی کا کہنا تھا کہ یومِ آزادی کے موقع پر ان سائنسدانوں اور ماہرین کو اعزازات سے نوازا جائے گا، جبکہ پسماندہ علاقوں سے تعلق رکھنے والے ماہرین کو بھی خصوصی طور پر مدنظر رکھا جائے گا۔ ان کا مزید کہنا تھا کہ ان اعزازات کے ذریعے نوجوانوں کو تحقیق، سائنس اور جدت کے میدان کی طرف راغب کیا جا سکے گا، کیونکہ ان شعبوں میں ترقی ہی ملک کی ترقی کا ضامن ہے۔ حکومت سائنس اور ٹیکنالوجی سے وابستہ افراد کی خدمات کو نہ صرف تسلیم کرتی ہے بلکہ ان کی عزت افزائی کو قومی فریضہ سمجھتی ہے۔

اسلام آباد ہائیکورٹ نے 9 مئی کے واقعے میں پاکستان تحریک انصاف (پی ٹی آئی) کے چار کارکنوں کو انسداد دہشتگردی عدالت کی جانب سے دی گئی 10، 10 سال قید کی سزا کالعدم قرار دیتے ہوئے بری کر دیا ہے۔ اسلام آباد ہائیکورٹ عالیہ کے جج جسٹس اعظم خان اور جسٹس خادم سومرو نے فریقین کے دلائل سننے کے بعد یہ فیصلہ سنایا۔ بری ہونے والے افراد میں سہیل، شاہ زیب، میرا خان اور اکرام خان شامل ہیں۔ انسداد دہشتگردی کی عدالت نے ان چاروں کو 30 مئی کو دیگر سات افراد سمیت سزا سنائی تھی جن میں پی ٹی آئی کے رکن قومی اسمبلی عبد الطیف بھی شامل تھے۔ وکیل بابر اعوان نے دلائل دیتے ہوئے کہا کہ پراسیکیوشن کے 9 گواہوں میں سے صرف ایک گواہ، اے ایس آئی محمد شریف، نے ملزمان کی شناخت کی جبکہ باقی گواہوں نے موقع پر موجودگی کا کوئی ثبوت نہیں دیا۔ عدالت نے شواہد کے فقدان پر استفسار کیا کہ جب نہ کوئی زخمی ہے، نہ میڈیکل رپورٹس موجود ہیں اور نہ ہی گواہان نے واضح شناخت کی ہے تو سزا کس بنیاد پر دی جائے؟ عدالت نے ریمارکس دیے کہ کیا محض شناخت پریڈ پر سزا دی جا سکتی ہے؟ پراسیکیوشن کی جانب سے اضافی وقت کی استدعا کو مسترد کرتے ہوئے عدالت نے ملزمان کو بری کر دیا۔