ایران اور اسرائیل کے درمیان جنگ بندی کے بعد پاکستان انٹرنیشنل ایئرلائن (پی آئی اے) نے خلیجی ممالک کے لیے اپنا فضائی آپریشن بحال کر دیا ہے، تاہم حالات معمول پر آنے کے باوجود مختلف ایئرپورٹس پر درجنوں پروازیں تاخیر اور منسوخی کا شکار رہیں۔ کراچی، لاہور اور اسلام آباد سمیت ملک بھر کے بڑے ہوائی اڈوں سے 55 پروازوں کی روانگی میں تاخیر ہوئی، جبکہ شارجہ سے پشاور، دبئی اور ابوظہبی کے لیے پانچ پروازیں مکمل طور پر منسوخ کر دی گئیں۔

قومی ایئرلائن کی لاہور سے مدینہ جانے والی پرواز 13 گھنٹے تاخیر کا شکار ہوئی جبکہ لاہور سے دمام کی پرواز بھی مقررہ وقت پر روانہ نہ ہو سکی۔ کراچی سے جدہ، دوحہ اور استنبول جانے والی آٹھ پروازیں منسوخ کی گئیں، اور اسلام آباد سے دبئی کے لیے پی آئی اے کی ایک پرواز 15 گھنٹے کی تاخیر سے دوچار رہی۔ بحرین سے اسلام آباد آنے والی دو پروازیں بھی چار چار گھنٹے تاخیر کا شکار ہوئیں۔

کراچی ایئرپورٹ پر بین الاقوامی پروازوں کی معطلی کے باعث مسافروں کا شدید رش دیکھنے میں آیا۔ دبئی، ابوظہبی، شارجہ اور دوحہ جانے والے افراد شدید پریشانی میں مبتلا رہے۔ ذرائع کے مطابق پروازوں کی روانگی سے متعلق مسافروں کو بروقت اطلاع نہ دی گئی، جس سے صورتِ حال مزید خراب ہوئی۔

قطر کی فضائی حدود بند ہونے کے باعث دوحہ ایئرپورٹ پر کنکٹنگ فلائٹس کے درجنوں مسافر پھنس گئے۔ مختلف ممالک سے پاکستان آنے والی کئی پروازوں کا شیڈول بری طرح متاثر ہوا۔

یاد رہے کہ پی آئی اے نے گزشتہ روز ایران کے میزائل حملوں کے بعد حفاظتی اقدامات کے تحت خلیجی ممالک جیسے کہ قطر، دبئی، بحرین اور کویت کیلئے فضائی آپریشن عارضی طور پر معطل کر دیا تھا، تاہم خطے میں کشیدگی میں کمی آنے کے بعد یہ آپریشن بحال کر دیا گیا ہے

معروف اداکارہ عائشہ خان کی کراچی کے علاقے گلشنِ اقبال میں اپنے فلیٹ میں تنہائی کے عالم میں موت اور کئی روز بعد لاش ملنے کی خبر نے سوشل میڈیا پر ہلچل مچا دی ہے۔ واقعے کے بعد صارفین کی جانب سے ان کے بچوں پر تنقید کی جا رہی ہے کہ وہ اپنی والدہ کا خیال کیوں نہ رکھ سکے۔ اس صورتحال پر سینئر اداکارہ بشریٰ انصاری نے ایک ویڈیو پیغام میں وضاحت پیش کی ہے جس میں انہوں نے عائشہ خان کے بچوں کی جانب سے صفائی دی ہے۔

بشریٰ انصاری نے بتایا کہ چند سال قبل ایک پروجیکٹ کے دوران ان کی عائشہ خان سے بات ہوئی تھی جس میں انہوں نے بتایا کہ ان کے بچے بیرونِ ملک مقیم ہیں لیکن ان سے مسلسل رابطے میں رہتے ہیں۔ عائشہ نے یہ بھی بتایا تھا کہ بچے ان کا بہت خیال رکھتے ہیں اور جاتے ہوئے ان کے درازوں میں پیسے تک رکھ جاتے ہیں، تاہم وہ اپنی مرضی سے تنہا زندگی گزار رہی تھیں کیونکہ انہیں بچوں کے گھروں میں رہنا پسند نہیں تھا۔

انہوں نے مزید کہا کہ عائشہ خان اپنی زندگی میں مطمئن تھیں، کتابیں پڑھتی تھیں، عبادت کرتی تھیں اور پڑوسیوں سے میل جول رکھتی تھیں۔ بشریٰ انصاری نے عوام سے اپیل کی کہ بغیر تحقیق کسی پر الزام نہ لگایا جائے کیونکہ ممکن ہے کہ ان کے بچے اس وقت شدید اذیت اور غم میں ہوں۔ انہوں نے عائشہ خان کے لیے دعائے مغفرت کی بھی درخواست کی۔

یاد رہے کہ عائشہ خان کی لاش ان کے فلیٹ سے ایک ہفتے بعد پڑوسیوں کی اطلاع پر ملی، جس پر پولیس نے فلیٹ کا دروازہ توڑ کر لاش کو تحویل میں لیا