اسلام آباد: پیپلز پارٹی اور متحدہ قومی موومنٹ کے ووٹوں سے منتخب آزاد سینیٹر فیصل واوڈا نے سینیٹ اجلاس میں خطاب کرتے ہوئے ملک کے دفاعی بجٹ کو دو سے تین گنا بڑھانے کا مطالبہ کیا ہے۔ ان کا کہنا تھا کہ ہمیں اپنا پیٹ کاٹ کر بھی افواج پاکستان کی تنخواہوں میں اضافہ کرنا ہوگا کیونکہ فوجی رمضان جیسے مہینے میں محض دو ہزار روپے میں سحری، افطاری اور رات کا کھانا کرتے ہیں۔ اگر ایک سپاہی کے چار بچے ہوں تو گویا ہم صرف 11 روپے روزانہ دے کر ان کی خدمات لے رہے ہیں، جو ناانصافی کے مترادف ہے۔

فیصل واوڈا نے کہا کہ پاکستان کی افواج ہماری سلامتی کی ضامن ہیں اور حالیہ معرکوں میں دشمن کے 285 اہلکاروں کو ہلاک کر کے دشمن کو واضح پیغام دیا گیا ہے۔ ان کے مطابق آرمی چیف جنرل سید عاصم منیر کی واضح ہدایت تھی کہ کسی شہری کو نقصان نہ پہنچے، اور افواج پاکستان نے اپنی پیشہ ورانہ مہارت سے بھارت کو بھرپور جواب دیا۔

انہوں نے کہا کہ پاکستان اور بھارت کے درمیان فوجی تعداد کا فرق ضرور ہے، لیکن ہماری پیشہ وارانہ صلاحیت اور جذبہ اس کمی کو پورا کرتا ہے۔ ان کا کہنا تھا کہ اب وقت آ گیا ہے کہ ترقیاتی منصوبوں سے زیادہ توجہ دفاع پر دی جائے، اور اس مقصد کے لیے حکومت کو اپوزیشن کو اعتماد میں لے کر آگے بڑھنا ہوگا۔ واوڈا نے اس بات پر زور دیا کہ قومی سلامتی پر کوئی سمجھوتہ ممکن نہیں اور پوری قوم افواج پاکستان کے ساتھ کھڑی ہے۔

کراچی: پاکستان اسٹاک ایکسچینج میں سرمایہ کاروں کا اعتماد بحال ہونے کے بعد مارکیٹ میں تیزی کا رجحان مسلسل دوسرے روز بھی برقرار رہا۔ جمعرات کو کے ایس ای 100 انڈیکس میں 717 پوائنٹس کا نمایاں اضافہ دیکھنے میں آیا، جس کے نتیجے میں انڈیکس 1 لاکھ 20 ہزار 649 پوائنٹس کی سطح پر پہنچ گیا۔

کاروبار کے آغاز پر ہی مارکیٹ میں 623 پوائنٹس کا اضافہ ہوا اور انڈیکس 1 لاکھ 20 ہزار 555 پوائنٹس تک جا پہنچا۔ اس تیزی کا تسلسل برقرار رہا اور انڈیکس نے دن کے دوران 717 پوائنٹس کا اضافہ حاصل کیا۔ تجزیہ کاروں کے مطابق یہ مثبت پیشرفت سرمایہ کاروں کے اعتماد کی بحالی، سیاسی استحکام اور معاشی بہتری کی علامت ہے۔پاکستان اسٹاک ایکسچینج

یاد رہے کہ گزشتہ روز بدھ کو بھی مارکیٹ میں زبردست تیزی ریکارڈ کی گئی تھی، جب انڈیکس 960 پوائنٹس کے اضافے کے ساتھ 1 لاکھ 19 ہزار 931 پوائنٹس پر بند ہوا تھا۔ ماہرین کا کہنا ہے کہ مارکیٹ میں اس وقت سرمایہ کاری کا رجحان مثبت ہے اور سرمایہ کار دوبارہ سرگرم ہوتے دکھائی دے رہے ہیں، جو کہ ملکی معیشت کے لیے خوش آئند اشارہ ہے۔