اسلامی تعاون تنظیم (او آئی سی) کے تحت اسلامی ممالک کے وزرائے خارجہ کا دو روزہ اہم اجلاس ترکیہ کے شہر استنبول میں منعقد ہوا۔ اجلاس میں 40 سے زائد مسلم ممالک کے وزرائے خارجہ اور سفارت کار شریک ہوئے، جن میں ایران کے وزیر خارجہ عباس عراقچی اور پاکستان کے نائب وزیراعظم و وزیر خارجہ اسحاق ڈار بھی شامل تھے۔ اجلاس کے دوران دونوں رہنماؤں کو ایک ساتھ نشستوں پر بیٹھے ہوئے بھی دیکھا گیا، جس سے سفارتی اہمیت کا اندازہ لگایا جا سکتا ہے۔

اجلاس میں مسلم دنیا کو درپیش چیلنجز، ایران میں حالیہ کشیدگی، اور مشرق وسطیٰ میں بگڑتی صورتحال پر تفصیلی غور کیا گیا۔ او آئی سی کے چیئرمین حسین ابراہیم طحہ نے اجلاس سے خطاب میں ایران پر اسرائیلی حملوں کی شدید مذمت کرتے ہوئے زور دیا کہ ایران اور اسرائیل کے درمیان جاری جنگ کو مذاکرات کے ذریعے ختم کیا جانا چاہیے۔ انہوں نے اس بات پر بھی زور دیا کہ اسرائیل کے خلاف او آئی سی کے فیصلوں پر مکمل عمل درآمد ہونا چاہیے۔

اس موقع پر ایک خصوصی سیشن ایران اسرائیل تنازع پر بھی رکھا گیا، جس میں حالیہ دنوں میں بڑھتی ہوئی کشیدگی پر غور کیا گیا۔ اجلاس میں پاکستانی وزیر خارجہ اسحاق ڈار نے خطے میں امن، سفارتکاری اور مسلم امہ کے اتحاد پر زور دیتے ہوئے فلسطین و کشمیر، اسلاموفوبیا اور مسلم دنیا کے دیگر اہم مسائل پر پاکستان کا مؤقف پیش کیا۔

اجلاس کے دوران ترک صدر رجب طیب اردوان نے بھی وزرائے خارجہ سے خصوصی خطاب کیا جس میں انہوں نے فلسطینیوں کی حالت زار اور مسلم ممالک کے درمیان اتحاد کی ضرورت پر روشنی ڈالی۔

ذرائع کے مطابق اجلاس کی سائیڈ لائنز پر کئی اہم دوطرفہ ملاقاتیں بھی ہوئیں، جن میں اسحاق ڈار کی سعودی وزیر خارجہ فیصل بن فرحان، ترک صدر رجب طیب اردوان اور ترک وزیر خارجہ حقان فدان سے ملاقاتیں شیڈول کی گئیں، جن کا مقصد خطے میں ہم آہنگی اور تعاون کو فروغ دینا ہے

ایران کے سپریم لیڈر آیت اللہ علی خامنہ ای کے مشیر علی شمخانی منظرعام پر آ گئے ہیں۔ اسرائیلی فوج کی جانب سے ان کی ہلاکت کا دعویٰ کیا گیا تھا، تاہم ایرانی رہنماعلی شمخانی نے ایک پیغام میں اپنی زندگی اور ہوش و حواس میں ہونے کی تصدیق کر دی ہے۔ یہ پیغام انہوں نے 13 جون کی صبح اسرائیلی حملے میں شدید زخمی ہونے اور ہسپتال منتقل کیے جانے کے بعد ایرانی قیادت اور عوام کے لیے جاری کیا۔

اپنے پیغام میں ایرانی رہنماعلی شمخانی نے کہا: “میں زندہ ہوں اور قربانی دینے کے لیے تیار ہوں، فتح کا سورج طلوع ہونے والا ہے۔” انہوں نے مزید کہا کہ ڈاکٹروں کی انتھک محنت کے باعث اب ان کی طبی حالت مستحکم ہے اور وہ روبہ صحت ہیں۔ انہوں نے اس عزم کا اعادہ کیا کہ ایران کا نام ہمیشہ تاریخ میں روشن رہے گا۔

باخبر ذرائع کے مطابق، علی شمخانی حملے میں بری طرح زخمی ہوئے تھے اور ان کی بائیں ٹانگ کو کاٹنا پڑا۔ ڈاکٹروں نے ان کی جان بچانے کے لیے کئی بڑے طبی اقدامات کیے، جبکہ ان کے بعض اندرونی اعضا اب بھی خطرے میں ہیں۔

یاد رہے کہ اسرائیلی جارحیت میں ایران کی مسلح افواج کے کئی اہم کمانڈرز، جن میں چیف آف اسٹاف جنرل محمد باقری، پاسدارانِ انقلاب کے سربراہ میجر جنرل حسین سلامی، اور ایرو اسپیس فورس کے کمانڈر امیر علی حاجی زادہ شامل ہیں، شہید ہو چکے ہیں۔ ایسے میں سوشل میڈیا پر یہ افواہیں بھی گردش کر رہی تھیں کہ علی شمخانی بھی زخموں کی تاب نہ لاتے ہوئے شہید ہو گئے، تاہم ان کا تازہ بیان ان افواہوں کی تردید ہے اور اس نے ایران میں ایک نیا حوصلہ پیدا کیا ہے