اسلام آباد:
وزیراعظم شہباز شریف نے مسلح افواج کے سربراہان کے ہمراہ انٹرسروسز انٹیلی جنس (آئی ایس آئی) ہیڈکوارٹرز کا دورہ کیا، جہاں انہیں ملکی سلامتی کی صورتحال پر تفصیلی بریفنگ دی گئی۔ ان کے ہمراہ نائب وزیراعظم و وزیر خارجہ اسحاق ڈار، وزیر دفاع خواجہ آصف بھی موجود تھے۔

وزیراعظم آفس سے جاری اعلامیہ کے مطابق، وزیراعظم کو مشرقی سرحد پر بھارت کے اشتعال انگیز رویے اور روایتی خطرات سے نمٹنے کے لیے کی جانے والی تیاریوں سے آگاہ کیا گیا۔ ساتھ ہی علاقائی سلامتی، ہائبرڈ وار فیئر، دہشت گردی کے پراکسی نیٹ ورکس اور نئے سیکیورٹی چیلنجز پر بھی تفصیلی بریفنگ دی گئی۔

وزیراعظم اور قومی قیادت نے ملکی خودمختاری و سالمیت کی حفاظت کے لیے بلا تعطل ادارہ جاتی ہم آہنگی، قومی نگرانی اور آپریشنل تیاریوں کو مزید مضبوط بنانے پر زور دیا۔ وزیراعظم نے آئی ایس آئی کی پیشہ ورانہ مہارت اور اسٹریٹجک فہم کو سراہتے ہوئے کہا کہ ادارہ مشکل حالات میں بروقت فیصلے لینے کی صلاحیت رکھتا ہے۔

وزیراعظم شہباز شریف نے کہا:

“پوری قوم اپنی بہادر مسلح افواج کے ساتھ کھڑی ہے۔ پاک فوج دنیا کی بہترین پیشہ ور اور منظم افواج میں سے ایک ہے۔ عوامی حمایت کے ساتھ ریاستی ادارے وطن عزیز کی سلامتی، وقار اور خودمختاری کے تحفظ کے لیے ہر وقت تیار ہیں۔”

قومی قیادت نے ایک بار پھر پاکستان کے دفاع کے لیے دوٹوک عزم کا اظہار کیا اور کہا کہ تمام ریاستی ادارے، سیاسی قیادت اور عوام مل کر دشمن کی ہر جارحیت کا بھرپور جواب دیں گے۔

دوسری جانب، ایک روز قبل وفاقی وزیر اطلاعات عطاء اللہ تارڑ اور ڈی جی آئی ایس پی آر لیفٹیننٹ جنرل احمد شریف چوہدری نے سیاسی قیادت کو پاک بھارت کشیدگی پر ان کیمرہ بریفنگ دی۔ اس اجلاس میں مسلم لیگ (ن)، پیپلز پارٹی، ایم کیو ایم، جے یو آئی، سابق وزیراعظم آزاد کشمیر، بلوچستان عوامی پارٹی سمیت کئی جماعتوں نے شرکت کی، تاہم پاکستان تحریک انصاف (پی ٹی آئی) نے بریفنگ میں شرکت نہیں کی۔

ڈی جی آئی ایس پی آر نے کہا:

“پاکستان ایک پرامن ملک ہے اور خطے میں امن چاہتا ہے، لیکن اگر پاکستان پر جارحیت مسلط کی گئی تو افواج پاکستان منہ توڑ جواب دینے کے لیے تیار ہیں۔”

اسلام آباد میں سپریم کورٹ رپورٹرز سے گفتگو کرتے ہوئے چیف جسٹس یحییٰ آفریدی نے کہا کہ عدالت عظمیٰ میں کیے جانے والے اچھے اقدامات اور مثبت پیش رفت کو بھی عوام تک پہنچنا چاہیے، کیونکہ موجودہ ملکی حالات کی وجہ سے لوگ دباؤ میں ہیں اور انہیں ایسے لمحات میں امید افزا خبریں ملنی چاہئیں۔ انہوں نے ذرائع ابلاغ سے حالات بہتر ہونے تک مثبت رپورٹنگ کی درخواست کی۔

چیف جسٹس کا کہنا تھا کہ سپریم کورٹ میں عمر قید کے 1200 سے زائد کیسز ایسے ہیں جن میں مجرمان اپنی سزا کا بیشتر حصہ کاٹ چکے ہیں، ایسے مقدمات کو ترجیحی بنیادوں پر سنا جائے گا۔ انہوں نے اعلان کیا کہ 15 جون سے سپریم کورٹ میں کیس دائری صرف سافٹ کاپی کے ذریعے کی جائے گی۔

انہوں نے بتایا کہ لاپتہ افراد کے مقدمات سے متعلق قومی جوڈیشل پالیسی کمیٹی نے حکومت اور انٹیلیجنس اداروں سے تجاویز مانگی تھیں، لیکن تاحال کوئی جواب موصول نہیں ہوا۔

چیف جسٹس یحییٰ آفریدی نے بتایا کہ ضلعی عدالتوں میں ڈبل شفٹ کے نفاذ اور اس میں کام کرنے والے ججز کی تنخواہوں میں 50 فیصد اضافے کی تجویز بھی زیر غور ہے، جو نیشنل جوڈیشل پالیسی میکنگ کمیٹی کے سامنے رکھی گئی ہے۔ انہوں نے ماڈل کورٹس سے متعلق کہا کہ ماضی میں ان عدالتوں کے اکثر فیصلے دوبارہ ٹرائل کے لیے بھیجے گئے، اس لیے اب صرف تین سال پرانے مقدمات کو ان عدالتوں میں لانے کی تجویز ہے۔

چیف جسٹس نے چین کے حالیہ دورے کا ذکر کرتے ہوئے کہا کہ وہاں ہمارا شاندار استقبال کیا گیا، اور چین کی سپریم کورٹ میں کوئی مقدمہ زیر التواء نہیں ہے، جس پر چینی ججز پاکستان کے مقدمات کی تعداد سن کر حیران رہ گئے۔ دورے کے دوران ایران، آذربائیجان، ترکی اور بھارت کے چیف جسٹسز سے ملاقاتیں ہوئیں۔

انہوں نے کہا کہ چین کے ساتھ پانچ سالہ مفاہمتی یادداشت پر دستخط کیے گئے ہیں، جس کے تحت عدالتی نظام میں مصنوعی ذہانت کے ذریعے بہتری لائی جائے گی۔ انہوں نے ترکی کے عدالتی نظام کی تعریف کرتے ہوئے کہا کہ وہاں فون پر کسی بھی مقدمے کی تفصیلات حاصل کی جا سکتی ہیں، ہم نے وہاں بھی مشترکہ مفاہمتی یادداشت کی بات کی۔

چیف جسٹس نے کہا کہ پاکستان میں انصاف کی فراہمی میں جدید ٹیکنالوجی کا استعمال نہ ہونا ایک بڑا مسئلہ ہے۔ اس ضمن میں 2009ء میں قائم کی گئی نیشنل جوڈیشل آٹومیشن کمیٹی کو دوبارہ فعال کر دیا گیا ہے۔ ہم چاہتے ہیں کہ سپریم کورٹ اور ہائیکورٹس کو نیٹ ورک کے ذریعے منسلک کیا جائے اور غیر ملکی فنڈنگ سے پہلے اپنے وسائل کو استعمال کیا جائے۔