ملک میں مہنگائی کا سلسلہ تھمنے کا نام نہیں لے رہا، حالانکہ حکومت کی جانب سے مہنگائی میں کمی کے دعوے کیے جا رہے ہیں۔ ادارہ شماریات کی جانب سے جاری کردہ تازہ ترین ہفتہ وار رپورٹ کے مطابق ایک ہفتے کے دوران مہنگائی میں اضافہ 0.27 فیصد اضافہ ریکارڈ کیا گیا ہے، جب کہ سالانہ بنیادوں پر مہنگائی کی شرح منفی 2.06 فیصد رہی۔ رپورٹ میں بتایا گیا ہے کہ ایک ہفتے کے دوران 23 اشیاء کی قیمتوں میں اضافہ ہوا، جبکہ 8 اشیاء کی قیمتوں میں کمی اور 20 اشیاء کی قیمتوں میں استحکام دیکھا گیا۔ سب سے زیادہ اضافہ ایل پی جی کے گھریلو سلنڈر کی قیمت میں ہوا، جو 452 روپے 47 پیسے مہنگا ہوا، جبکہ زندہ مرغی، چینی، چاول، دالیں، آٹا، پٹرول، ڈیزل، گوشت، گھی اور پیاز بھی مہنگی ہونے والی اشیاء میں شامل ہیں۔ دوسری جانب انڈے، ٹماٹر اور لہسن جیسی چند اشیاء کی قیمتوں میں معمولی کمی ریکارڈ کی گئی ہے۔ عوام کا کہنا ہے کہ مہنگائی میں اضافہ اشیائے خورونوش کی قیمتوں میں مسلسل اضافے نے ان کی زندگی کو دشوار بنا دیا ہے اور حکومت کے ریلیف اقدامات صرف دعووں تک محدود دکھائی دیتے ہیں

وزیراعظم پاکستان میاں شہباز شریف اور امریکی وزیر خارجہ کے درمیان اہم ٹیلیفونک رابطہ ہوا ہے جس میں دو طرفہ تعلقات، علاقائی صورتحال اور عالمی امور پر تبادلہ خیال کیا گیا۔ وزیراعظم شہباز شریف نے امریکی صدر ڈونلڈ ٹرمپ کیلئے نیک خواہشات کا اظہار کرتے ہوئے ان کے پاکستان سے متعلق مثبت بیانات کو سراہا۔

گفتگو کے دوران وزیراعظم نے کہا کہ پاکستان مشرق وسطیٰ میں قیام امن کیلئے تعمیری کردار ادا کرنے کیلئے تیار ہے۔ انہوں نے بھارت کے ساتھ کشمیر سمیت تمام مسائل کے حل کیلئے مذاکرات پر زور دیا اور پاک بھارت جنگ کے خطرے کو ٹالنے میں امریکہ کے کردار کو قابلِ ستائش قرار دیا۔

وزیراعظم نے تجارت، سرمایہ کاری، توانائی، آئی ٹی اور معدنیات کے شعبوں میں پاک امریکہ تعاون بڑھانے کی خواہش کا اظہار کیا اور دہشت گرد گروہوں کے خلاف پاکستان کی موثر کارروائیوں کا ذکر بھی کیا، جس پر امریکی وزیر خارجہ نے پاکستان کی انسداد دہشتگردی کی کوششوں کو سراہا۔

شہباز شریف نے صدر ٹرمپ اور پاکستانی آرمی چیف فیلڈ مارشل سید عاصم منیر کی ممکنہ ملاقات کو مثبت پیشرفت قرار دیا۔

دوسری جانب وائٹ ہاؤس کی ترجمان کیرولین لیویٹ نے بتایا کہ امریکی صدر ڈونلڈ ٹرمپ آئندہ دو ہفتوں میں یہ فیصلہ کریں گے کہ آیا امریکہ ایران کے خلاف ممکنہ جنگ میں اسرائیل کا ساتھ دے گا یا نہیں۔ ترجمان کے مطابق صدر ٹرمپ نے اس مسئلے پر مذاکراتی راستہ بھی کھلا رکھنے کا اشارہ دیا ہے۔

یہ رابطہ ایسے وقت پر ہوا ہے جب خطے میں کشیدگی میں اضافہ ہو رہا ہے، اور عالمی سطح پر سفارتی کوششوں کی شدت بڑھ رہی ہے۔