پشاور:
وزیراعلیٰ خیبرپختونخوا علی امین گنڈاپور نے مجوزہ مائنز اینڈ منرلز بل سے متعلق سوشل میڈیا پر گردش کرنے والی افواہوں اور مفروضات کو بے بنیاد قرار دیتے ہوئے واضح کیا ہے کہ بل کو مکمل مشاورت کے بعد ہی منظور کیا جائے گا اور اگر کسی ترمیم کی ضرورت محسوس ہوئی تو وہ بھی کی جائے گی۔

انہوں نے پی ٹی آئی پارلیمنٹرینز کے واٹس ایپ گروپ میں ایک آڈیو پیغام کے ذریعے اپنے مؤقف کی وضاحت کرتے ہوئے کہا کہ بل سے متعلق جو قیاس آرائیاں کی جا رہی ہیں وہ حقیقت پر مبنی نہیں ہیں۔ انہوں نے کہا کہ تمام ارکان کو بل کی کاپیاں فراہم کی جا چکی ہیں، اس لیے جنہیں سمجھنے میں مشکل ہو وہ کسی وکیل کے ساتھ بیٹھ کر اس کا مطالعہ کریں تاکہ اصل حقیقت واضح ہو سکے۔

وزیراعلیٰ نے یہ بھی کہا کہ بعض افراد نے بل پڑھے بغیر اس پر بیانیہ تشکیل دے دیا ہے جو مناسب رویہ نہیں۔ انہوں نے اس بات پر زور دیا کہ بل میں نہ تو صوبے کے اختیارات کسی اور کو منتقل کیے جا رہے ہیں اور نہ ہی خصوصی سرمایہ کاری سہولت کونسل یا وفاقی حکومت کو کوئی اضافی اختیار دیا جا رہا ہے۔ علی امین گنڈاپور نے کہا کہ قانون سازی ایک سنجیدہ عمل ہے اور اراکین اسمبلی کی ذمہ داری ہے کہ وہ بل کو سمجھ کر رائے قائم کریں۔

ان کا کہنا تھا کہ بغیر کسی بڑی اصلاح کے بھی مائنز اینڈ منرلز کے شعبے سے حاصل ہونے والا ریونیو ساڑھے تین ارب روپے تک پہنچ چکا ہے اور 30 جون تک اس میں دوگنا اضافہ ہونے کا امکان ہے، جو اس شعبے کی بہتری کی طرف اشارہ ہے۔ وزیراعلیٰ نے آخر میں کہا کہ حکومت شفاف طریقے سے بل کو حتمی شکل دے گی اور تمام تحفظات کا جائزہ لے کر ضروری اقدامات کیے جائیں گے۔