عمران خان کا کہنا ہے کہ عدالتوں کو مفلوج کر دیا گیا ہے اور کورٹ پیکنگ کے ذریعے انصاف کی راہ میں رکاوٹیں کھڑی کر دی گئی ہیں، دوسری جنگ عظیم کے دوران جب جرمن طیارے لندن پر بمباری کر رہے تھے تو ونسٹن چرچل نے کہا تھا کہ اگر ہماری عدالتیں انصاف فراہم کر رہی ہیں تو ہمیں شکست نہیں ہو سکتی، بدقسمتی سے آج ہمارا عدالتی نظام اس معیار کے بالکل برعکس کھڑا ہے، اڈیالہ جیل میں وکلاء سے گفتگو کرتے ہوئے عمران خان نے کہا کہ آج انصاف نہ صرف تاخیر کا شکار ہے بلکہ دانستہ طور پر دبایا جا رہا ہے، مجھے اور میری اہلیہ کو محض سیاسی انتقام کا نشانہ بنا کر قید میں رکھا گیا ہے، میرے وکلاء اور اہل خانہ سے ملاقات کی اجازت نہ دینا ان جعلی مقدمات کی قلعی کھول دیتا ہے، خواتین کے ساتھ جو غیر انسانی سلوک روا رکھا جا رہا ہے وہ پاکستان کے امیج کو دنیا بھر میں نقصان پہنچا رہا ہے، ڈاکٹر یاسمین راشد کو مسلسل قید میں رکھنا، عالیہ حمزہ کی بلا جواز گرفتاری اور بشریٰ بی بی کو ایسے مقدمے میں سزا دینا جس سے ان کا کوئی تعلق نہیں، انتقامی طرزِ سیاست کا واضح ثبوت ہے، مجھے وکلاء سے ملاقات کی اجازت نہ دینا اور کورٹ پیکنگ کا مقصد یہ ہے کہ میرے کیسز کی شنوائی نہ ہو تاکہ مجھے جھوٹے مقدمات میں قید رکھا جا سکے اور الیکشن کے بعد بننے والے جعلی حکومتی سیٹ اپ کو قانونی تحفظ دیا جا سکے، عمران خان نے کہا کہ افغان مہاجرین سے متعلق موجودہ پالیسی درست نہیں، ان کے ساتھ روا رکھا جانے والا سلوک اور زبردستی ملک بدری کے اقدامات ملک میں مزید بدامنی اور نفرت کو ہوا دے رہے ہیں، بلوچستان طرز کے اغوا کے واقعات انتہائی قابل تشویش ہیں، فیصلوں کے غلط نتائج کا ملبہ خیبرپختونخوا حکومت پر آئے گا اس لیے علی امین ان معاملات پر فوری ایکشن لیں، دھاندلی کے مقدمات ایک سال سے لٹکے ہوئے ہیں، جنید اکبر کو چاہیے کہ اس پر سیاسی اور احتجاجی حکمت عملی ترتیب دیں، بار کونسلز الیکشن میں انتظار پنجوتھہ انصاف لائرز فورم کے امیدوار سامنے لائیں اور پوری پارٹی صرف اپنے امیدواروں کی حمایت کرے۔