پنجاب کے دارالحکومت لاہور میں انسداد دہشت گردی کی عدالت نے پاکستان تحریکِ انصاف کے سینئر رہنما شاہ محمود قریشی کی 9 مئی کے جلاؤ گھیراؤ کیس میں ضمانت منظور کرلی ہے۔ عدالت نے یہ فیصلہ وکلاء کے دلائل مکمل ہونے کے بعد محفوظ کیا تھا، جو اب سنا دیا گیا۔ انسداد دہشت گردی عدالت لاہور کے جج منظر علی گل نے تھانہ شادمان میں درج مقدمے میں شاہ محمود قریشی کی درخواست ضمانت منظور کرتے ہوئے انہیں ریلیف فراہم کیا۔ شاہ محمود قریشی کو سینہ میں درد کے باعث چند روز قبل پنجاب انسٹیٹیوٹ آف کارڈیالوجی (پی آئی سی) منتقل کیا گیا تھا، جہاں علاج کے بعد انہیں دوبارہ کوٹ لکھپت جیل لاہور واپس بھیج دیا گیا۔

ادھر اسلام آباد کی ڈسٹرکٹ اینڈ سیشن عدالت نے پی ٹی آئی کے متعدد رہنماؤں کے خلاف احتجاج اور توڑ پھوڑ کے مقدمات کا فیصلہ سناتے ہوئے بیرسٹر گوہر علی خان، عمر ایوب، علی بخاری، شعیب شاہین اور دیگر کو تھانہ کراچی کمپنی میں درج مقدمات سے بری کر دیا۔ جوڈیشل مجسٹریٹ شہزاد خان نے وکلاء صفائی کے دلائل سننے کے بعد فیصلہ محفوظ کیا تھا جو اب سنایا جا چکا ہے۔ اس فیصلے میں پی ٹی آئی رہنما عامر ڈوگر، ملک رفیق اور عامر مغل کی بریت کی درخواستیں بھی منظور کر لی گئیں، جس سے پارٹی قیادت کو قانونی محاذ پر بڑی کامیابی ملی ہے۔

ترک صدر رجب طیب اردوان نے اسلامی تعاون تنظیم (او آئی سی) کے وزرائے خارجہ اجلاس سے خطاب کرتے ہوئے اسرائیلی وزیر اعظم نیتن یاہو کو خطے کے لیے خطرناک قرار دیا اور انہیں ہٹلر سے تشبیہ دی۔ ترک صدر اردوان نے کہا کہ نیتن یاہو پورے مشرق وسطیٰ کو تباہی کی طرف دھکیل رہا ہے اور اسرائیل کے ہاتھ مسلمانوں کے خون سے رنگے ہوئے ہیں۔ اردوان نے مسلم ممالک پر زور دیا کہ وہ اسرائیلی جارحیت کے خلاف متحد ہو جائیں کیونکہ موجودہ وقت امت مسلمہ کے اتحاد کا تقاضا کرتا ہے۔ ان کا کہنا تھا کہ اسرائیل نہ صرف ایران بلکہ یمن، لیبیا اور شام پر بھی حملے کر چکا ہے اور اب یہ تنازع تیزی سے ایسے مقام کی طرف بڑھ رہا ہے جہاں سے واپسی ممکن نہ ہوگی۔ اردوان نے واضح کیا کہ اسرائیل خطے کے امن کی سب سے بڑی رکاوٹ ہے اور مغربی طاقتیں اس دہشتگرد ریاست کی حمایت کر رہی ہیں، جو انتہائی تشویشناک ہے۔ انہوں نے کہا کہ ایران اور امریکہ کے درمیان مذاکرات کو سبوتاژ کرنا بھی اسرائیل کا ایک ناپاک مقصد ہے، اور اسرائیل اس جنگ کو پھیلانا چاہتا ہے، جس کے اثرات نہ صرف خطے بلکہ یورپ اور ایشیا تک محسوس کیے جائیں گے۔ ترک صدر نے کہا کہ ایران پر اسرائیلی جارحیت کی شدید مذمت کرتے ہیں اور ترک عوام ایرانی عوام کے ساتھ مکمل یکجہتی کا اظہار کرتے ہیں۔ ان کا کہنا تھا کہ اب وقت آگیا ہے کہ مسلم دنیا اپنے اختلافات ختم کر کے ایک ہو جائے اور قبلہ اول کے تحفظ کے لیے مشترکہ مؤقف اپنائے۔ اجلاس کے دوران ترکیہ کو تنظیم کی آئندہ تین سالہ چیئرمین شپ سونپ دی گئی، جبکہ ترک وزیر خارجہ حقان فدان نے اپنے افتتاحی خطاب میں ایران پر حملوں کی مذمت کرتے ہوئے امت مسلمہ کے اتحاد پر زور دیا