ممبئی:
معروف بھارتی اداکار اور اپنے “بابو بھائیآ” کے مشہور کردار سے شہرت پانے والے پاریش راول نے حال ہی میں ایک حیران کن انکشاف کیا ہے، جس نے مداحوں اور سوشل میڈیا صارفین کو حیرت میں ڈال دیا۔

بھارتی میڈیا رپورٹس کے مطابق پاریش راول نے ایک بھارتی یوٹیوب چینل کو دیے گئے انٹرویو میں بتایا کہ فلم ’گھاتک‘ کی شوٹنگ کے دوران گھٹنے کی شدید چوٹ لگنے کے بعد انہوں نے 15 دن تک اپنا پیشاب پیا تاکہ چوٹ جلدی ٹھیک ہو سکے۔

اداکار نے واقعہ کی تفصیل بتاتے ہوئے کہا کہ فلم کے ایک سین میں ساتھی اداکار راکیش پانڈے نے انہیں مچھلی مارکیٹ میں گھسیٹنا تھا۔ چونکہ سیٹ پر فراہم کردہ چپلیں پھسلن والی تھیں، وہ بار بار پھسل رہے تھے۔ ایک موقع پر جب راکیش نے پوری قوت سے انہیں گھسیٹا تو ان کے گھٹنے میں چوٹ لگ گئی۔

حادثے کے بعد ٹنّو آنند اور ڈینی ڈینزونگپا انہیں فوری طور پر ناناوتی اسپتال لے گئے۔ پاریش راول کے مطابق اس وقت انہیں لگا کہ ان کا فلمی کیریئر شاید ختم ہو جائے۔ اسپتال میں ان سے اجے دیوگن کے والد اور مشہور ایکشن ڈائریکٹر ویرو دیوگن ملنے آئے اور ایک روایتی علاج تجویز کیا۔

ویرو دیوگن نے مشورہ دیا کہ: “صبح اٹھ کر سب سے پہلے اپنا پیشاب پیو، یہی طریقہ پرانے فائٹرز استعمال کرتے ہیں، کوئی تکلیف نہیں ہو گی۔ تاہم رات کو شراب، گوشت اور تمباکو سے پرہیز کرنا ہوگا۔”

پاریش راول نے اس مشورے پر عمل کرتے ہوئے مسلسل 15 دن تک یہ طریقہ اپنایا۔

ان کے اس انکشاف کے بعد سوشل میڈیا پر شدید ردعمل دیکھنے میں آ رہا ہے۔ صارفین نے طنزیہ اور مزاحیہ انداز میں تبصرے کیے ہیں، جبکہ کچھ نے انہیں تنقید کا نشانہ بھی بنایا ہے۔

نئی دہلی:
بھارتی حکومت نے سچ چھپانے کی کوشش کرتے ہوئے یوٹیوب پر موجود کئی پاکستانی چینلز پر پابندی لگا دی ہے۔ اطلاعات کے مطابق بھارت نے 16 پاکستانی یوٹیوب چینلز پر پابندی عائد کی ہے۔ بھارتی وزارت داخلہ کی ہدایت پر یہ پابندیاں لگائی گئیں، جس سے ظاہر ہوتا ہے کہ پہلگام فالس فلیگ آپریشن کے بعد بھارتی حکومت سخت بوکھلاہٹ کا شکار ہے اور الٹے سیدھے اقدامات کر رہی ہے۔

ذرائع کے مطابق پہلگام واقعے کے بعد پاکستانی عوام نے بھارتی میڈیا کے گمراہ کن پروپیگنڈے کا سوشل میڈیا پر بھرپور جواب دیا تھا۔ پاکستانی صارفین نے نہ صرف حقائق کو اجاگر کیا بلکہ بھارتی میڈیا کی جانب سے کی جانے والی غلط بیانیوں کا ترکی بہ ترکی جواب بھی دیا۔

بھارتی میڈیا، خصوصاً چینل انڈیا ٹوڈے نے اعتراف کیا کہ پاکستانی عوام سوشل میڈیا پر پہلگام حملے کے بعد نمایاں طور پر حاوی نظر آئے۔ چینل نے یہ بھی تسلیم کیا کہ پاکستانی عوام کی جانب سے چلائی جانے والی مہم میں 45,000 سے زائد پوسٹیں نریندر مودی اور بھارتی حکومت کو نشانہ بنانے پر مبنی تھیں۔

پاکستانی سوشل میڈیا صارفین نے مربوط حکمت عملی کے تحت پیغامات اور ہیش ٹیگز کو بڑے پیمانے پر پھیلایا، جس کے باعث بھارتی فوج اور میڈیا بھی پاکستانی عوام کی تنقید کی زد میں آ گئے۔

ماہرین کا کہنا ہے کہ انڈیا ٹوڈے کا یہ اعتراف دراصل پاکستانی عوام کی قومی یکجہتی اور پاکستان کی سالمیت کے دفاع میں ان کی بھرپور اور مؤثر ڈیجیٹل جدوجہد پر مہر ثبت کرتا ہے۔

پاکستانی عوام نے بھارتی پروپیگنڈے کا سوشل میڈیا پر نہ صرف مؤثر جواب دیا بلکہ عالمی سطح پر بھارت کے جھوٹے بیانیے کو بے نقاب بھی کیا۔