مشرق وسطیٰ میں جاری کشیدگی کے پیشِ نظر سابق امریکی صدر ڈونلڈ ٹرمپ نے ایرانی شہریوں کو تہران فوری خالی کرنے کی ہنگامی وارننگ جاری کر دی ہے۔ اپنے بیان میں ٹرمپ نے کہا کہ تہران میں انسانی جانوں کا ضیاع شرمناک ہوگا، لہٰذا شہر کے تمام افراد کو فوری طور پر انخلاء کرنا چاہیے۔ انہوں نے واضح کیا کہ ایران کو نیوکلیئر ڈیل پر دستخط کر دینے چاہییں تھے، میں نے کئی بار انہیں خبردار کیا لیکن انہوں نے سنجیدگی سے نہیں لیا، اور اب صورتحال نازک رخ اختیار کر چکی ہے۔ ٹرمپ کا کہنا تھا کہ ایران کسی صورت نیوکلیئر ہتھیار حاصل نہیں کر سکتا۔

ٹرمپ کی وارننگ کے بعد ایرانی سرکاری میڈیا نے تصدیق کی ہے کہ مشرقی تہران میں دھماکوں کی آوازیں سنی گئی ہیں۔ پریس ٹی وی نے اطلاع دی ہے کہ ایک مقام پر اسرائیلی حملے کے بعد دھواں اٹھتا دیکھا گیا۔ ایران کے سرکاری خبر رساں ادارے ارنا کے مطابق، موجودہ صورتحال کے پیش نظر ایرانی فضائی حدود کی بندش میں توسیع کر دی گئی ہے، جو اب مقامی وقت کے مطابق دوپہر دو بجے تک برقرار رہے گی تاکہ پروازوں کی سکیورٹی کو یقینی بنایا جا سکے۔

یاد رہے کہ اسرائیل اور ایران کے درمیان جاری جنگ میں دونوں ممالک کی جانب سے ایک دوسرے پر لگاتار حملے کیے جا رہے ہیں، جس کی وجہ سے فضائی سفر شدید متاثر ہے اور مسافر پروازوں کو متبادل راستے اختیار کرنا پڑ رہے ہیں۔ تجزیہ کاروں کے مطابق مشرق وسطیٰ کی صورتحال غیرمعمولی حد تک سنگین ہو چکی ہے اور عالمی برادری کو فوری اقدامات کرنے کی ضرورت ہے تاکہ خطے میں امن و استحکام قائم رہ سکے۔

نائب وزیراعظم اور وزیر خارجہ سینیٹر اسحاق ڈار نے سینیٹ میں اظہار خیال کرتے ہوئے کہا ہے کہ اسرائیل پاکستان کو میلی آنکھ سے دیکھنے کی ہمت بھی نہیں کر سکتا۔ انہوں نے وضاحت کی کہ اسرائیلی وزیراعظم کا جو بیان میڈیا پر چلایا جا رہا ہے وہ پرانا ہے، جبکہ وزیر دفاع خواجہ آصف کے حوالے سے بھی ایک جعلی کلپ گردش کر رہا ہے۔ اسحاق ڈار کا کہنا تھا کہ ملک کو درپیش خطرات کے وقت ہم سب ایک ہیں اور پاکستان کی مسلح افواج مکمل طور پر الرٹ ہے۔ انہوں نے کہا کہ فیک نیوز کی بھرمار ہے اور عوام کو احتیاط سے کام لینا چاہیے۔

اسحاق ڈار نے واضح کیا کہ پاکستان نے اسرائیل سے بھی بڑے دشمنوں کا مقابلہ کیا ہے اور اگر پاکستان پر کسی قسم کا حملہ ہوا تو اینٹ کا جواب پتھر سے دیا جائے گا۔ انہوں نے مزید کہا کہ پاکستان ہمیشہ تنازعات کو مذاکرات کے ذریعے حل کرنے پر یقین رکھتا ہے، اسی مقصد کے تحت امریکا اور ایران کے درمیان مذاکرات کی کامیابی کے لیے بھی پاکستان نے مثبت کردار ادا کیا۔ انہوں نے بتایا کہ ایران اور عمان کے وزرائے خارجہ انہیں مسلسل آگاہ رکھتے رہے اور 15 جون کو امریکا اور ایران کے درمیان دوبارہ مذاکرات شیڈول تھے۔

علاوہ ازیں، وزیر خارجہ اسحاق ڈار نے مصر کے وزیر خارجہ بدر عبدلطیٰ سے ٹیلیفون پر گفتگو کی جس میں ایران کے خلاف اسرائیلی جارحیت کے تناظر میں خطے میں بگڑتی صورتحال پر گہری تشویش کا اظہار کیا گیا۔ دونوں رہنماؤں نے خطے میں امن و استحکام کے لیے مشترکہ کوششوں کے عزم کا اعادہ کیا۔ اسی روز، نائب وزیراعظم سے جاپان میں پاکستان کے نامزد سفیر عبدالحمید بھٹہ نے ملاقات کی۔ دفتر خارجہ کے مطابق اسحاق ڈار نے سفیر کو نئی ذمہ داری پر مبارکباد دی اور پاک جاپان تعلقات خصوصاً تجارت، سرمایہ کاری، آئی ٹی اور صنعتی شعبوں میں تعاون بڑھانے کی اہمیت پر زور دیا۔