قومی اسمبلی کی قائمہ کمیٹی برائے خزانہ کے اجلاس میں نان رجسٹرڈ افراد کے خلاف سخت اقدامات کا فیصلہ کیا گیا ہے، جن کے تحت سیلز ٹیکس میں رجسٹریشن نہ کرانے والے افراد کے بینک اکاؤنٹس بند کر دیے جائیں گے اور بجلی و گیس کے کنکشن بھی منقطع کیے جائیں گے۔ اجلاس کی صدارت سید نوید قمر نے کی جبکہ چیئرمین ایف بی آر راشد لنگڑیال نے تفصیلات سے آگاہ کرتے ہوئے بتایا کہ ایسے تمام افراد کو پہلے نوٹس دیا جائے گا، اور اگر وہ رجسٹریشن نہ کرائے تو ان کے اکاؤنٹس بند کر دیے جائیں گے، تاہم رجسٹریشن کے بعد اکاؤنٹس دو دن میں بحال کر دیے جائیں گے۔ انہوں نے مزید بتایا کہ بہت سے کاروباری افراد انکم ٹیکس میں رجسٹرڈ ہیں لیکن سیلز ٹیکس میں نہیں، خاص طور پر کراچی میں متعدد فیکٹریاں سیلز ٹیکس رجسٹریشن کے بغیر کام کر رہی ہیں۔ اجلاس میں “ٹیئر ون” نان رجسٹرڈ ریٹیلرز کے لیے بجلی اور گیس کے کنکشن کاٹنے کی بھی منظوری دی گئی۔ کمیٹی ممبران نے ایف بی آر کی تجویز 14 اے سی کی حمایت کی، تاہم بعض ارکان جیسے شرمیلا فاروقی نے سزاؤں کے بجائے مراعات دینے پر زور دیا تاکہ لوگ رضاکارانہ طور پر ٹیکس نیٹ میں آئیں۔ وزیر خزانہ محمد اورنگزیب نے واضح کیا کہ اب ٹیکس چھوٹ یا ایمنسٹی اسکیمیں نہیں دی جائیں گی، اور تمام شہریوں کو ٹیکس نیٹ میں لانے کا عمل جاری ہے۔ چیئرمین ایف بی آر نے مرحلہ وار اکاؤنٹس بند کر کے بحال کرنے کی تجویز پیش کی جسے کمیٹی نے مناسب قرار دے کر اس پر مزید کام کرنے کی ہدایت کی

نئے مالی سال کے آغاز سے قبل حکومت نے پٹرولیم مصنوعات پر مہنگائی کا نیا بوجھ ڈالنے کی تیاری مکمل کر لی ہے، اور قومی اسمبلی کی قائمہ کمیٹی برائے خزانہ نے پٹرولیم لیوی (PDL) کی شرح 90 روپے فی لیٹر تک بڑھانے کی اجازت دے دی ہے۔ جمعرات کے روز ہونے والے اجلاس میں وزارت خزانہ کے حکام نے بتایا کہ اگر ضرورت پیش آئی تو حکومت آئندہ مالی سال میں پٹرولیم لیوی 90 روپے تک لے جا سکتی ہے۔ اس کے ساتھ ساتھ پٹرولیم مصنوعات پر “کاربن لیوی” عائد کرنے کی تجویز بھی منظور کر لی گئی ہے، جبکہ فرنس آئل پر بھی لیوی لگانے کی تیاری کی جا رہی ہے جس سے 100 ارب روپے کا ریونیو حاصل ہونے کا تخمینہ ہے۔ حکام کا کہنا ہے کہ ایک ہزار میگاواٹ بجلی پیدا کرنے والے آئی پی پیز کے لیے سالانہ 1.2 ملین ٹن فرنس آئل درآمد کیا جاتا ہے۔ حکومت کی جانب سے پٹرولیم لیوی کی مد میں مجموعی طور پر 1,468 ارب روپے اکٹھا کرنے کا ہدف رکھا گیا ہے۔ یہ تمام اقدامات اس وقت کیے جا رہے ہیں جب عالمی منڈی میں تیل کی قیمتوں میں نمایاں کمی آ چکی ہے، لیکن اس کے باوجود پاکستانی عوام کو اس کمی کا کوئی فائدہ نہیں دیا گیا۔ بلکہ حالیہ دنوں میں پٹرولیم مصنوعات کی قیمتوں میں مزید اضافہ کر دیا گیا ہے، اور امکان ہے کہ یکم جولائی سے پٹرول اور ڈیزل کی قیمتیں مزید بڑھائی جائیں گی