لاہور اور گردونواح میں رات بھر ہونے والی موسلا دھار بارش سے شہر کے متعدد علاقے زیرآب آگئے جبکہ مختلف افسوسناک حادثات میں ایک ہی خاندان کے 5 افراد سمیت 10 شہری جاں بحق ہو گئے۔ سب سے زیادہ بارش پانی والا تالاب میں 171 ملی میٹر ریکارڈ کی گئی جو رواں مون سون سیزن کی بلند ترین مقدار ہے۔لاہور شدید بارش کے باعث ٹھوکر نیاز بیگ میں گھر کی چھت گرنے سے 5 افراد جاں بحق اور 2 زخمی ہوئے، رائیونڈ کے مشن کالونی میں بھی چھت گرنے سے 3 افراد جاں بحق ہو گئے جبکہ ہربنس پورہ میں کرنٹ لگنے سے 2 بچے دم توڑ گئے۔ اسلام آباد، راولپنڈی اور پنجاب کے دیگر شہروں میں بھی موسلا دھار بارش سے نشیبی علاقے زیرآب آ گئے، محکمہ موسمیات کے مطابق بارشوں کا موجودہ سلسلہ 17 جولائی تک جاری رہے گا۔ خیبرپختونخوا میں لینڈ سلائیڈنگ کا خدشہ ہے اور این ڈی ایم اے کی جانب سے الرٹ بھی جاری کر دیا گیا ہے۔

وفاقی حکومت نے چینی کی قیمت میں بتدریج اضافے کا فیصلہ کر لیا ہے جس کے مطابق 15 اگست سے 15 اکتوبر تک ہر پندرہ دن بعد چینی کی فی کلو قیمت میں 2 روپے کا اضافہ کیا جائے گا۔ ذرائع وزارت صنعت و پیداوار کے مطابق یہ اضافہ چار مراحل میں ہوگا جس کے بعد چینی کی قیمت 165 روپے سے بڑھ کر 171 روپے فی کلو تک پہنچ جائے گی۔ یہ اضافہ کرشنگ سیزن کے آغاز سے قبل کیا جا رہا ہے، جبکہ 15 اکتوبر کے بعد قیمتوں میں مزید اضافہ نہیں ہوگا۔ اس وقت چینی کی فی کلو قیمت میں 27.50 روپے کے ٹیکسز بھی شامل ہیں۔

دوسری جانب، وفاقی حکومت نے چینی کی درآمد پر ٹیکس چھوٹ سے متعلق آئی ایم ایف کے شدید تحفظات کے بعد 3 لاکھ میٹرک ٹن چینی کا جاری کردہ ٹینڈر واپس لے لیا ہے اور اس کی جگہ 50 ہزار میٹرک ٹن چینی کا نیا ٹینڈر جاری کیا گیا ہے جس کے لیے 22 جولائی تک بولیاں طلب کی گئی ہیں۔ آئی ایم ایف نے حکومت کے چینی کی ٹیکس فری درآمد کے فیصلے کو 7 ارب ڈالر کے قرض پروگرام کی خلاف ورزی قرار دیا اور اس اقدام پر سخت اعتراض کیا۔ اگرچہ حکومت نے غذائی ایمرجنسی کو بنیاد بنا کر دفاع کیا، تاہم آئی ایم ایف نے اس دلیل کو قبول نہیں کیا، اور معاہدے کے تحت کسی بھی قسم کی نئی ٹیکس چھوٹ کی اجازت نہیں دی گئی۔