اسلام آباد:
وزیر اعظم کے سیاسی مشیر رانا ثنا اللہ نے کہا ہے کہ پاکستان تحریک انصاف (پی ٹی آئی) کی مذاکراتی کمیٹی کی جانب سے حکومتی کمیٹی کو پیش کردہ چارٹر آف ڈیمانڈ محض جھوٹ اور پروپیگنڈے پر مبنی ہے۔
رانا ثنا اللہ خان نے اسلام آباد میں پریس کانفرنس کرتے ہوئے کہا کہ آج حکومت اور اپوزیشن کی کمیٹی کی میٹنگ ہوئی، جس میں تحریک انصاف نے اپنا چارٹر آف ڈیمانڈ پیش کیا، جو کہ پہلے ہی میڈیا کو جاری کیا جا چکا تھا۔
ان کا کہنا تھا کہ یہ میری ذاتی رائے ہے اور اس کا جواب کمیٹی دے گی۔ وزیراعظم نے تمام اتحادیوں پر مشتمل ایک کمیٹی تشکیل دی ہے، جو ایک مؤثر جواب تیار کرے گی، اور ہم جو جواب پیش کریں گے وہ حتمی ہوگا۔
انہوں نے مزید کہا کہ ان کے پہلے دو بنیادی مطالبات اس میں شامل نہیں ہیں، جن میں ایک یہ تھا کہ ہمارا مینڈیٹ واپس کیا جائے، جس سے وہ دستبردار ہو چکے ہیں۔ دوسرا مطالبہ یہ تھا کہ تمام مقدمات سیاسی نوعیت کے ہیں، لیکن انہوں نے کسی ورکر کا نام یا ایف آئی آر کا نمبر فراہم نہیں کیا۔
رانا ثنا اللہ نے یہ بھی کہا کہ 9 مئی کی گرفتاری کے معاملے پر سپریم کورٹ پہلے ہی کارروائی کر چکی ہے، اور گڈ ٹو سی یو والا مشہور معاملہ بھی اسی کیس میں آیا تھا، جس پر چیف جسٹس نے نوٹس لیا تھا۔ یہ ایک ختم شدہ معاملہ ہے، اور اب اس پر کیا ہوگا، یہ تمام کیسز انسداد دہشت گردی کے تحت ہیں۔