9 مئی کے 8 مقدمات کے اندر بانی پی ٹی آئی عمران خان کی ضمانتیں مسترد کرنے کا تحریر ی فیصلہ جاری کر دیا گیا ہے، جج نے 6صفحات پر مشتمل تحریر ی فیصلہ جاری کیا ہے، جاری فیصلے میں کہا گیا ہے کہ 9 مئی سازش کے گواہان کے بیانات بھی ریکارڈ پر موجود ہیں جبکہ پراسکیوشن کے پاس اشتعال انگیزی کے لیے دی جانے والی ہدایات کے ثبوت بھی موجود ہیں۔
میڈیا رپورٹس کے جاری کردہ اعلامیہ کے مطابق فیصلے میں یہ بھی کہا گیا ہے کہ یہ پراسیکیوشن کا کیس ہے کیونکہ بانی پی ٹی آئی نے گرفتاری سے قبل سازش کی۔ فیصلے میں یہ بھی کہا گیا کہ تمام واقعات میں ملٹری تنصیبات، سرکاری اداروں اور پولیس اہلکاروں پر بھی حملے کئے گئے۔ لہذا بانی پی ٹی آئی کی ضمانتیں خارج کی جاتیں ہیں۔پراسیکیوشن کی اطلاع کے مطابق بانی پی ٹی آئی نے اپنی ممکنہ گرفتاری کے حوالے سے بھی ایک سازش تیار کی کہ اگر گرفتاری کی کوئی صورت بنے تو دیگر قیادت ریاستی مشینری کو جام کردے۔

تحریری فیصلے میں یہ بھی کہا گیا کہ وکیل نے دلائل دئیے ہیں کہ وقوعہ کی انجام دہی کے وقت بانی پی ٹی آئی گرفتار تھے جبکہ وکیل بانی پی ٹی آئی کی دلیل میں کوئی وزن نہیں، وکیل نے یہ دلائل بھی دئیے کہ مختلف کیسز میں ضمانتیں بعد از گرفتاری بھی ہو چکی ہیں۔فیصلے میں یہ بھی کہا گیا کہ یہ پراسکیوشن کا کیس ہے کہ بانی پی ٹی آئی عمران خان نے ملٹری تنصیبات پر حملوں کی ہدایت کی۔ بانی پی ٹی آئی کی ہدایت پر ناصرف رہنماؤں بلکہ ان کے حمایتیوں نے بھی سختی سے عمل کیا۔
وکیل بانی پی ٹی آئی نے یہ اعتراض بھی اٹھایا کہ مبینہ سازش کی کوئی تاریخ، وقت،جگہ بھی متعین نہیں۔تحریری فیصلے میں یہ بھی کہا گیا کہ ہر کیس کا فیصلہ اس کیس کے اپنے میرٹس پرہی ہونا چاہیے۔موجودہ کیس سازش یا اشتعال انگیزی پر اکسانے کا کوئی عام یا معمولی کیس نہیں۔عدالت نے اپنے تحریری فیصلے میں کہا کہ بانی پی ٹی آئی عمران خان کوئی معمولی آدمی نہیں ان کی ہدایات اور بیانات کی ان کے حامیوں کی نظر میں بہت قدر ہے۔
پی ٹی آئی کی دیگر قیادت نے بانی پی ٹی آئی عمران خان کی ہدایات کو مسترد کرنے کا سوچا تک نہیں۔ پولیس کے مطابق 11 مئی کو پولیس کے اوپر تشدد سمیت ایسے بہت سے واقعات رونما ہوئے۔تحریری فیصلے میں یہ بھی کہا گیا کہ پراسیکیوشن کے مطابق زمان پارک میں 7 مئی اور 9 مئی کو باقاعدہ اس سازش کو تیار کیا گیا تھا۔ خفیہ پولیس اہلکاروں نے خود کو پی ٹی آئی ورکرز ظاہر کرتے ہوئے اس سازش کو سنا تھا، انسداد دہشتگری کی عدالت لاہور بانی پی ٹی آئی عمران خان کو قصور وار قرار دیتی ہے۔