علی امین گنڈاپور نے کہا ہے کہ اگر تم میں دم ہے تو گورنر راج لگا کر دکھاو، جسے گورنر راج لگانے کا بہت شوق ہے وہ اپنا شوق پورا کر کے دیکھ لے۔ تفصیلات کے مطابق خیبرپختونخواہ اسمبلی کے اجلاس سے گفتگو کے دوران وزیر اعلٰی علی امین گنڈاپور نے کہا کہ پارٹی میں کسی طرح کا کوئی اختلافات نہیں ہے، ڈی چوک کے شہدا کا خون کبھی رائیگاں نہیں جائے گا۔
حکومت نے اپنی روایات کو برقرار رکھتے ہوئے 245 کے تحت فوج کو مظاہرے میں مداخلت کی اجازت دی، انار کلی، ماڈل ٹاؤن کے بعد ڈی چوک پر بھی گولیاں برسائی گئیں۔ انہوں نے کہا کہ دادو خیل کے مقام سے ہم پر فائرنگ کا جو سلسلہ شروع ہوا، وہ چونگی 26 پر ہم پر گولیاں برسا کر بھی ختم نہیں ہوا ، ہمارا بے گناہ لیڈر جیل میں بند ہے ہم صرف اس
کی رہائی کے لیے احتجاج کررہے تھے۔

وزیر اعلیٰ نے کہا کہ اپنے لیڈر کی خاطر اتنی بڑی تعداد میں عوام لے کر نکلے، میں چلینج کرتا ہوں ماضی کا کوئی اتنا بڑا مارچ دکھائیں، ہم کبھی بھی اپنے کارکنان کا خون رائیگاں نہیں جانے دیں گے، جنہوں نے یہ حرکت کی انہیں عبرت ناک سزا ملے گی۔

علی امین گنڈا پور نے کہا کہ دہشت گردی کا مقابلہ بھی ہم خود کریں، ہمیں مجبور نہ کریں کہ ہم پھر نعرہ لگائیں کہ ایسے صحیح تو پھر ایسے ہی صحیح، جب پنجاب پولیس کے اہلکار پکڑے گئے تو انہوں نے عمران خان کے ہی نعرے لگائے۔ عمران خان کا کہنا تھا کہ ڈی چوک تک جاؤ اور ہمارے لوگ وہیں تک گئے اگر کوئی اس سے آگے گیا تو میں یقین سے کہتا ہوں ان میں بھی ماسک والے لوگ ہی ہونگے، ریڈ زون کسی کے باپ کا ہے کیا ؟ جواب یہ دو کہ گولیاں کیوں ماری تھیں؟۔
ہمارے شہداء نے جس مقصد کیلئے قربانیاں دیں ہیں ہم انشاء اللہ وہ مقصد حاصل کرکے رہیں گے، ہمارے شہداء کی قربانیاں ضائع نہیں ہوں گی۔ علی امین گنڈاپور نے حکومتی رہنماوں پر بھی تنقید کرتے ہوئے کہا کہ بے شرم، بے غرت ہمیں یہ کہتے ہیں کہ بھاگ گئے، ہمارے لوگ کیا دہشتگرد ہیں؟ تُم گولیاں مارو اور ہم بیچارے کھڑے رہیں، اب جب ہم اسلحہ لے کر آئیں گے تو بتائیں گے کہ بھاگتا کون ہے، تگڑے ہو جانا سب۔
اسلحہ، بارود، پیسہ ہمارے پاس بھی سب کچھ ہے ڈرو اُس وقت سے کہ جب ہم کہیں گولی کا جواب گولی ہی ہے، تمہارے باپ میں بھی جرات ہے تو لگاؤ گورنر راج میں چیلنج کرتا ہوں، اگر تم اس صوبے میں رہ گئے تو سمجھنا تم اپنے باپ سے پیدا نہیں ہوئے ہوں گے۔