ترک صدر رجب طیب اردوان نے سماجی رابطے کی ویب سائٹ ایکس (ٹوئٹر) پر ایک بیان جاری کرتے ہوئے پاکستان کے ساتھ اپنی گہری محبت اور حمایت کا اظہار کیا۔ انہوں نے وزیراعظم شہباز شریف کو “قیمتی بھائی” کہہ کر مخاطب کیا اور کہا کہ ترکی پاکستان کی امن، استحکام اور ضبط و تحمل پر مبنی پالیسیوں کو بہت اہمیت دیتا ہے، جو کہ مکالمے اور مصالحت کے ذریعے تنازعات کے حل کو ترجیح دیتی ہیں۔ صدر اردوان نے یہ عزم دہرایا کہ ترکی ماضی کی طرح مستقبل میں بھی ہر حال میں پاکستان کے ساتھ کھڑا رہے گا۔ ان کا کہنا تھا کہ ترکی اور پاکستان کے درمیان سچی دوستی اور بھائی چارے کی مثال دنیا میں کم ہی ملتی ہے۔ اپنے پیغام کے آخر میں انہوں نے “پاکستان ترکی دوستی زندہ باد” کا نعرہ بھی لگایا۔ یہ بات بھی قابل ذکر ہے کہ اس سے پہلے وزیراعظم شہباز شریف نے ترکی کے ساتھ مل کر دہشتگردی کے خاتمے کے عزم کا اظہار کرتے ہوئے کرد ورکرز پارٹی (PKK) کی تحلیل کو ترکی کے امن کی جانب ایک اہم قدم قرار دیا تھا۔

امریکی صدر ڈونلڈ ٹرمپ اپنے پہلے غیر ملکی دورے پر سعودی عرب پہنچ گئے ہیں، جہاں ان کا استقبال سعودی ولی عہد شہزادہ محمد بن سلمان نے کیا۔ ریاض کے کنگ خالد ایئرپورٹ پر امریکی صدر ڈونلڈ ٹرمپ کو روایتی عربی قہوہ پیش کیا گیا۔ ٹرمپ اس چار روزہ مشرق وسطیٰ کے دورے میں قطر اور متحدہ عرب امارات بھی جائیں گے۔ ان کے ہمراہ امریکی وزیر خارجہ، وزیر دفاع اور اعلیٰ فوجی حکام بھی موجود ہیں۔ اس دورے کو عالمی سطح پر غیر معمولی اہمیت دی جا رہی ہے۔ وائٹ ہاؤس کے مطابق صدر ٹرمپ کی سعودی قیادت سے اہم ملاقاتیں ہوں گی، جن میں علاقائی سیکیورٹی، دفاعی تعاون، اور اقتصادی شراکت داری زیر بحث آئیں گے۔ صدر ٹرمپ خلیجی تعاون کونسل (GCC) کے اجلاس میں بھی شرکت کریں گے، جہاں دہشتگردی کے خلاف اقدامات اور خطے کی تازہ صورتحال پر بات چیت کی جائے گی۔ امریکی میڈیا کے مطابق اس دورے کے دوران ایران کے جوہری پروگرام، تیل کی قیمتوں پر کنٹرول، اور دو طرفہ سرمایہ کاری جیسے امور پر بھی تبادلہ خیال متوقع ہے۔ ٹرمپ نے اس سے قبل کہا تھا کہ انہوں نے سعودی عرب سے کہا ہے کہ اگر وہ ایک ٹریلین ڈالر امریکی کمپنیوں میں سرمایہ کاری کریں تو وہ سعودی عرب کا دورہ کریں گے۔ اس اہم دورے کا مقصد خطے سے نئی سرمایہ کاری حاصل کرنا اور امریکی خارجہ پالیسی میں مشرق وسطیٰ کی اہمیت کو اجاگر کرنا ہے۔