ڈی جی آئی ایس پی آر لیفٹیننٹ جنرل احمد شریف چوہدری نے ایک انٹرویو میں واضح کیا ہے کہ پاکستان کی فوج کسی بھی سیاسی جماعت سے مذاکرات یا پس پردہ رابطوں میں ملوث نہیں اور نہ ہی ایسی کسی بات میں دلچسپی رکھتی ہے۔ بی بی سی کو دیے گئے انٹرویو میں انہوں نے کہا کہ افواجِ پاکستان کو سیاست میں نہ گھسیٹا جائے کیونکہ فوج صرف آئینی حدود میں رہ کر ریاستی حکومت کے تحت کام کرتی ہے، جو سیاسی جماعتوں پر مشتمل ہوتی ہے۔ ان کا کہنا تھا کہ یہ سیاستدانوں کا کام ہے کہ وہ آپس میں بات کریں اور مسائل کا حل نکالیں، فوج صرف ریاستی احکامات کی پیروی کرتی ہے۔

لیفٹیننٹ جنرل احمد شریف نے عمران خان سے کسی بھی طرح کے رابطوں کی تردید کرتے ہوئے کہا کہ یہ سب افواہیں ہیں جن کا مقصد سیاسی مفادات حاصل کرنا ہوتا ہے۔ انہوں نے کہا کہ فوج اپنی پیشہ ورانہ ذمہ داریاں انجام دینے پر مکمل توجہ دیتی ہے اور پاکستانی عوام، ملکی سالمیت اور خودمختاری کے تحفظ کی ضامن ہے۔ ڈی جی آئی ایس پی آر نے اس تاثر کو بھی رد کیا کہ فوج عوام سے دور یا تقسیم شدہ ہے، اور کہا کہ ہم بطور ادارہ متحد ہیں اور قوم کے ساتھ کھڑے ہیں۔

انہوں نے مثالیں دیتے ہوئے کہا کہ کورونا وبا کے دوران این سی او سی کی قیادت فوج کے پاس تھی، پولیو مہمات اور بجلی چوری روکنے کے لیے بھی فوج کو بلایا جاتا ہے۔ نہروں کی صفائی سے لے کر سیلابی صورتحال میں امداد تک، فوج ہمیشہ عوامی فلاح کے لیے حکومت کے کہنے پر میدان میں آتی ہے، چاہے حکومت کسی بھی سیاسی جماعت کی ہو۔ ان کا کہنا تھا کہ خیبر پختونخوا اور بلوچستان میں فوج کی تعیناتی بھی صوبائی حکومتوں کی درخواست پر عمل میں لائی جاتی ہے، اس لیے یہ تاثر دینا کہ فوج خود کوئی فیصلہ کرتی ہے، درست نہیں۔ فوج سے صرف اتنا مطالبہ ہے کہ اسے سیاسی تنازعات سے دور رکھا جائے تاکہ وہ اپنی پیشہ ورانہ ذمہ داریاں مؤثر انداز میں نبھا سکے۔

پاکستان کی کان کنی کی صنعت نے عالمی سطح پر ایک نئی تاریخ رقم کر دی ہے، جب تھر میں کام کرنے والی ’سندھ اینگرو کول مائننگ کمپنی‘ کو پانی کے مؤثر استعمال پر ’الائنس فار واٹر اسٹیورڈشپ‘ (اے ڈبلیو ایس) کا گولڈ سرٹیفکیشن دیا گیا۔ یہ سرٹیفکیشن دنیا میں پہلی بار کسی بھی کان کنی کمپنی کو دیا گیا ہے، جو پاکستان کے لیے ایک بڑا اعزاز ہے۔ یہ اہم کامیابی اسپیشل انویسٹمنٹ فسیلیٹیشن کونسل (SIFC) کی پالیسیوں کا نتیجہ ہے، جن کے تحت کان کنی کا شعبہ تیزی سے ترقی کر رہا ہے۔ اے ڈبلیو ایس اقوام متحدہ اور دیگر عالمی اداروں کے تعاون سے 2009 میں قائم کیا گیا تھا، جس کا مقصد پانی کے ذمے دارانہ استعمال کو فروغ دینا ہے۔ سندھ اینگرو کول مائننگ کمپنی کے جدید واٹر مینجمنٹ ماڈل کو عالمی سطح پر پائیدار ترقی کی ایک مثال کے طور پر تسلیم کیا گیا ہے۔ تھر میں نہ صرف زرعی منصوبوں کو فروغ دیا گیا بلکہ مقامی آبادی کو صاف پانی اور صفائی ستھرائی کی بنیادی سہولیات بھی فراہم کی گئیں۔ اس کے علاوہ 23 جدید پلانٹس کے ذریعے پانی کی فراہمی نے اس منصوبے کو معاشی ترقی کا اہم سنگ میل بنا دیا ہے، جس کے باعث پاکستان کی کان کنی کی صنعت کو بین الاقوامی سطح پر نمایاں پذیرائی مل رہی ہے۔