پاکستان میں نئے گیس کنکشنز پر عائد پابندی ختم کرنے کے لیے پٹرولیم ڈویژن نے وفاقی کابینہ کو سمری بھیج دی ہے۔ ذرائع کے مطابق ابتدائی طور پر ایک لاکھ 20 ہزار نئے کنکشن فراہم کیے جائیں گے اور ان درخواست گزاروں کو ترجیح دی جائے گی جنہیں پہلے ڈیمانڈ نوٹس جاری ہو چکے یا جنہوں نے ایمرجنسی فیس جمع کرائی مگر پابندی کے باعث کنکشن حاصل نہ کرسکے۔ پاکستان اندازاً ڈھائی لاکھ سے زائد افراد اس زمرے میں آتے ہیں، تاہم انہیں اس بات کا حلف دینا ہوگا کہ وہ پرانے دعوؤں یا کنکشن فیس میں اضافے کے خلاف عدالت سے رجوع نہیں کریں گے۔ اس وقت ملک میں گیس کمپنیوں کے پاس تقریباً 35 لاکھ نئی درخواستیں زیر التوا ہیں۔

اطلاعات کے مطابق نئے کنکشنز کی فیس 40 ہزار سے 50 ہزار روپے مقرر کی جائے گی جبکہ صارفین کو نوٹیفائیڈ ری گیسیفائیڈ لیکویفائیڈ نیچرل گیس (آر ایل این جی) کے نرخ پر بل جاری ہوگا جو فی الوقت 3 ہزار 200 روپے فی ایم ایم بی ٹی یو ہے۔ جی ایس ٹی سمیت یہ قیمت 3 ہزار 900 سے 4 ہزار روپے فی ایم ایم بی ٹی یو تک پہنچ جائے گی۔ رپورٹ کے مطابق، نئے کنکشنز دینے کی تجویز اس لیے بھی دی گئی ہے تاکہ نیٹ ورک میں موجود اضافی گیس کو استعمال کیا جا سکے جو پائپ لائن سسٹم اور ریاستی معاہدوں کے لیے خطرہ بن رہی ہے۔

سابق وفاقی وزیر اور موجودہ آزاد سینیٹر فیصل واوڈا نے کہا ہے کہ پاکستان کی ترقی کے راستے میں رکاوٹیں ڈالنے والے بڑے بڑے طرم خان اب رگڑ دیے جائیں گے۔ اپنے ایک بیان میں ان کا کہنا تھا کہ سیاستدان، این جی اوز اور دیگر عناصر ذاتی مفادات کے لیے ہمیشہ افواج پاکستان کو کمزور کرنے کی سازشیں کرتے رہے ہیں، لیکن ایک بار پھر فیلڈ مارشل کی سربراہی میں پاک فوج نے ملک کو بڑی دہشت گردی سے بچا لیا ہے جس کی تفصیلات جلد سامنے آئیں گی۔ فیصل واوڈا نے مزید کہا کہ منافق سیاستدان اور دیگر لوگ اپنی سمت درست کر لیں، ورنہ ترقی کے جاری تسلسل میں رکاوٹ ڈالنے والوں کو سخت انجام بھگتنا پڑے گا۔

انہوں نے کہا کہ فیلڈ مارشل کی بین الاقوامی کامیابیاں اس بات کا ثبوت ہیں کہ بھارت کو جنگ میں شکست، تجارتی میدان میں شرمندگی، اور اب بی ایل اے و مجید بریگیڈ کو امریکہ کی جانب سے عالمی دہشت گرد قرار دینا، دراصل بھارت کے دہشت گرد ہونے کی تصدیق ہے۔ فیصل واوڈا کا کہنا تھا کہ فیلڈ مارشل نے عالمی سطح پر اپنی صلاحیتیں ثابت کی ہیں، کاش پاکستان کے پاس بھی ایسا جمہوری لیڈر ہوتا، کیونکہ نہ ماضی میں کوئی نظر آیا، نہ آج ہے اور نہ مستقبل میں دکھائی دے رہا ہے۔