وزیراعظم یوتھ پروگرام کے تحت ملک بھر میں اسپیشلائزڈ ڈیجیٹل سکلز ٹریننگ آف ٹرینرز پروگرام کا باضابطہ آغاز کردیا گیا۔ چیئرمین رانا مشہود احمد خان کے مطابق ابتدائی مرحلے میں 200 ٹرینرز کو مصنوعی ذہانت، ای کامرس، ڈیجیٹل مارکیٹنگ اور ڈیٹا اینالٹکس جیسے جدید شعبوں میں آن لائن تربیت دی جائے گی۔ یہ پروگرام نیوٹیک، یونی سروسز انٹرنیشنل اور آئی ٹی ایم سی چائنا کے اشتراک سے شروع کیا گیا ہے، جس کے تحت تربیت مکمل کرنے والے شرکاء کو پاکستان اور چین کے اداروں کی مشترکہ اسناد دی جائیں گی۔ رانا مشہود نے کہا کہ یہ اقدام ڈیجیٹل پاکستان وژن کے تحت نوجوانوں کو عالمی معیار کی مہارتیں فراہم کرنے کی جانب اہم قدم ہے۔

امریکا میں ایمیزون ویب سروسز (AWS) میں اچانک آنے والی خرابی کے باعث دو ہزار سے زائد ویب سائٹس بند ہوگئیں۔ رپورٹ کے مطابق رابن ہڈ اور وینمو جیسے بڑے پلیٹ فارم بھی متاثر ہوئے۔ ماہرین کا کہنا ہے کہ مسئلہ امریکا کے مشرقی حصے میں ڈی این ایس سسٹم کی خرابی کے باعث پیدا ہوا۔ ایمیزون کے ترجمان نے تصدیق کی ہے کہ کمپنی اس مسئلے سے آگاہ ہے اور خرابی کی وجوہات معلوم کرنے کے لیے تحقیقات جاری ہیں۔ اس تکنیکی مسئلے کے باعث یو ایس ایسٹ سے منسلک عالمی سروسز بھی متاثر ہو سکتی ہیں۔