معروف پاکستانی اداکارہ، ماڈل اور میزبان امبر خان نے حال ہی میں ایک مارننگ شو میں شرکت کے دوران اپنی شادی شدہ زندگی میں پیش آنے والے مسائل پر کھل کر بات کی۔

انہوں نے بتایا کہ ان کی شادی صرف 20 سال کی عمر میں ہوئی، اور کم عمری میں شادی کے باعث انہیں کئی طرح کی مشکلات کا سامنا رہا۔ امبر خان کا کہنا تھا کہ اگر شوہر اچھا ہو تو یہ ایک بڑی خوش نصیبی ہوتی ہے۔ ان کے مطابق ان کے سسرال والوں سے تعلقات بہتر تھے، لیکن اصل مسئلہ شوہر کے رویے سے تھا جو ان کے لیے سخت اذیت کا باعث بنا۔

امبر خان نے انکشاف کیا کہ وہ شوہر کے ہر حکم کو بغیر سوال کیے مانتی رہیں اور اپنی خودداری کو بار بار قربان کرتی رہیں۔ ان کے والدین بھی ان کے حد سے زیادہ خاموش اور صابر رویے پر حیران تھے۔ انہوں نے بتایا کہ ان کی والدہ نے انہیں خوداعتمادی اور حق کے لیے آواز اٹھانے کا حوصلہ دیا، مگر پھر بھی وہ اپنے شوہر کے سامنے بولنے کی ہمت نہ کر سکیں۔

اداکارہ نے مزید کہا کہ ان کا شوہر لاپرواہ اور خودسر تھا، جو کسی کی بات سننے کو تیار نہ تھا۔ جب انہوں نے اپنے حق کے لیے آواز اٹھانی شروع کی، تو ان کا رشتہ بدلنے لگا۔ امبر خان نے کہا کہ وہ کئی سالوں تک ذہنی اذیت برداشت کرتی رہیں، مگر اب وہ مزید ایسا برداشت نہیں کر سکتیں۔

ان کے اس انٹرویو کو ناظرین کی جانب سے بھرپور پذیرائی ملی اور خواتین کی بڑی تعداد نے ان کے حوصلے اور سچ بولنے کے جذبے کو سراہا۔

ترکی کی مشہور ڈیجیٹل کریئیٹر اور سوشل میڈیا انفلوئنسر ترکاں آتائے نے پاکستانی فیشن ڈیزائنر ماریہ بی پر رقم کی نامکمل ادائیگی کا سنگین الزام عائد کیا ہے، جس کے بعد یہ معاملہ سوشل میڈیا اور شوبز حلقوں میں کافی موضوعِ بحث بنا ہوا ہے۔

ترکاں آتائے، جنہوں نے پاکستان سے تعلیم حاصل کی اور اردو زبان میں کانٹینٹ بنا کر بڑی شہرت حاصل کی، ایک ویڈیو پیغام میں کہا کہ 2025 کے آغاز میں ماریہ بی کی ٹیم نے ان سے ترکی میں ہونے والے ایک فیشن شوٹ کے لیے رابطہ کیا۔ ان کے بقول، دونوں کے درمیان فی لباس معاوضے پر معاہدہ طے پایا کیونکہ ترکی میں اس نوعیت کے شوٹس لباس کے حساب سے چارج کیے جاتے ہیں۔

ترکاں کا کہنا ہے کہ انہوں نے نہ صرف مکمل کوٹیشن ماریہ بی کو فراہم کی بلکہ فوٹوشوٹ مکمل کیا، مواد تیار کیا اور اسے سوشل میڈیا پر بھی پوسٹ کیا، تاہم اس تمام کام کے باوجود مکمل ادائیگی نہیں کی گئی۔

مزید یہ کہ ترکاں کے مطابق، ماریہ بی کی ٹیم نے بعد میں مؤقف اختیار کیا کہ وہ ریلس (Reels) کے حساب سے ادائیگی کرتی ہے، جو کہ اصل معاہدے سے بالکل مختلف بات تھی۔ ترکاں نے شکوہ کیا کہ تین ماہ گزرنے کے باوجود انہیں اب تک مکمل ادائیگی موصول نہیں ہوئی، جس کی وجہ سے انہوں نے اعلان کیا کہ وہ آئندہ کبھی بھی ماریہ بی کے ساتھ کام نہیں کریں گی۔

اس معاملے پر ماریہ بی کی جانب سے تاحال کوئی باضابطہ ردعمل سامنے نہیں آیا، تاہم سوشل میڈیا صارفین اس تنازعے پر مختلف آراء کا اظہار کر رہے ہیں، کچھ ترکاں کی حمایت کر رہے ہیں تو کچھ معاملے کی مزید وضاحت کا انتظار کر رہے ہیں۔