پاکستان سپر لیگ (پی ایس ایل) کے 10ویں ایڈیشن کے آغاز سے پہلے پشاور زلمی اور کوئٹہ گلیڈی ایٹرز کے درمیان ہونے والا نمائشی میچ خطرے میں پڑ گیا ہے۔ میڈیا کی رپورٹس کے مطابق، یہ میچ 8 اپریل کو خراب آؤٹ فیلڈ کی وجہ سے ممکن نہیں ہوگا۔

پاکستان کرکٹ بورڈ (پی سی بی) کی ٹیم نے پشاور کے ارباب نیاز اسٹیڈیم کا معائنہ کیا اور وہاں کی حالت کو دیکھتے ہوئے اسے نمائشی میچ کی میزبانی کے لیے نامناسب قرار دیا۔ رپورٹ میں بتایا گیا ہے کہ پچ اور آؤٹ فیلڈ کی حالت ٹھیک نہیں ہے، اور ڈریسنگ رومز میں بنیادی سہولیات بھی نہ ہونے کے برابر ہیں۔ اسی طرح، میڈیا باکس اور کمنٹری کے لیے بھی مناسب سہولیات موجود نہیں ہیں۔

دوسری جانب، پشاور زلمی کے مالک جاوید آفریدی نے پی ایس ایل کے 10ویں ایڈیشن کے میچز پشاور میں کرانے کے لیے چیئرمین پی سی بی محسن نقوی سے رابطہ کیا ہے۔ یاد رہے کہ پی ایس ایل کا 10واں ایڈیشن 11 اپریل سے شروع ہوگا، جس میں افتتاحی میچ میں چیمپئن اسلام آباد یونائیٹڈ اور لاہور قلندرز کی ٹیمیں آمنے سامنے ہوں گی۔

قومی کرکٹ ٹیم کے کپتان سلمان علی آغا نے کرائسٹ چرچ میں ایک پریس کانفرنس کے دوران کہا کہ ہم نیوزی لینڈ کے خلاف جیتنے کا عزم لے کر آئے ہیں۔ انہوں نے یہ بھی بتایا کہ وہ صائم ایوب اور فخر زمان کو مس کریں گے، لیکن نئے کھلاڑیوں میں کافی صلاحیت ہے اور وہ ٹیم کو جتوانے کی بھرپور قابلیت رکھتے ہیں۔ انہوں نے یہ بھی کہا کہ پلیئنگ الیون کا اعلان جلد ہی کیا جائے گا۔

سلمان علی آغا نے مزید کہا کہ ہم یہاں صرف جیتنے کے لیے آئے ہیں۔ ہمیں معلوم ہے کہ فینز پاکستان ٹیم سے ناراض ہیں، اور ان کی ناراضگی بالکل جائز ہے۔

ہماری ٹیم نوجوان ہے، لیکن جیتنے کے لیے ان میں جوش و خروش موجود ہے۔ کرائسٹ چرچ کی وکٹ بظاہر گرین نظر آ رہی ہے، اور فاسٹ باؤلرز کے ساتھ ساتھ سپنرز بھی اس کا فائدہ اٹھا سکتے ہیں۔

انہوں نے یہ بھی کہا کہ شاہین اور حارث رؤف بہترین باؤلرز ہیں، اور اس سیریز میں ان کا کردار بہت اہم ہوگا۔ کارکردگی میں اتار چڑھاؤ آنا کھیل کا حصہ ہے، اور رضوان اور بابر نے جیت میں اہم کردار ادا کیا ہے، لیکن اب ہم نے ایک نیا کمبی نیشن آزمانے کا فیصلہ کیا ہے۔

سلمان آغا نے مزید کہا کہ فخر اور صائم ایوب تیزی سے فٹ ہو رہے ہیں، اور امید ہے کہ وہ آئندہ سیریز میں دستیاب ہوں گے۔ ہمارا مقصد ایشیاء کپ اور ٹی ٹونٹی ورلڈ کپ کے لیے ایک مضبوط ٹیم تیار کرنا ہے۔