اسلام آباد:
وفاقی حکومت نے وزیر خزانہ محمد اورنگزیب کی قیادت میں باضابطہ طور پر کرپٹو کونسل قائم کر دی ہے، جو مؤثر پالیسی سازی، جدیدیت کے فروغ اور محفوظ مالیاتی نظام کے قیام میں اہم کردار ادا کرے گی۔

وزارت خزانہ کی جانب سے جاری کردہ بیان کے مطابق، وزیر خزانہ محمد اورنگزیب پاکستان کرپٹو کونسل کے سربراہ ہوں گے، جبکہ وزیر خزانہ کے چیف ایڈوائزر بلال بن ثاقب کو اس کونسل کا سی ای او مقرر کیا گیا ہے۔

اعلامیے میں یہ بھی کہا گیا کہ بلال ثاقب بلاک چین ٹیکنالوجی، سرمایہ کاری کی حکمت عملی اور ڈیجیٹل جدت کے شعبے میں اپنی مہارت کے ذریعے اس اقدام کی قیادت کریں گے۔

وزارت خزانہ نے مزید بتایا کہ پاکستان کرپٹو کونسل کے بورڈ میں گورنر اسٹیٹ بینک آف پاکستان، چیئرمین سیکیورٹیز اینڈ ایکسچینج کمیشن آف پاکستان (ایس ای سی پی)، وفاقی سیکریٹری قانون اور وفاقی سیکریٹری شامل ہیں۔

کونسل کے بارے میں کہا گیا کہ یہ کرپٹو اپنانے کے لیے واضح ضابطہ جاتی ہدایات مرتب کرنے کی سفارشات پیش کرے گی اور عالمی کرپٹو اور بلاک چین تنظیموں کے ساتھ روابط قائم کر کے بہترین عالمی روایات اپنانے میں تجاویز دے گی۔

وزارت خزانہ نے یہ بھی بتایا کہ کونسل مالیاتی ٹیکنالوجی، اسٹارٹ اپس، سرمایہ کاروں اور بلاک چین ڈیولپرز کے ساتھ مل کر ذمہ دارانہ جدت کو فروغ دے گی۔

پاکستان نے اپنے موجودہ قرض پروگرام پر سختی سے عمل درآمد کیا ہے۔ اس دوران، پاکستان کے ساتھ 7 ارب ڈالر کے قرض پروگرام، موسمیاتی مالیات، اور قرضوں کی ادائیگی کی مینجمنٹ پر بھی بات چیت ہوئی۔ عالمی مالیاتی فنڈ (آئی ایم ایف) اور پاکستان کے درمیان پہلے اقتصادی جائزے کے مذاکرات کامیابی سے مکمل ہوگئے ہیں، جس کے نتیجے میں آئی ایم ایف نے پاکستان کو دو ارب ڈالر کی یقین دہانی کرائی۔ آئی ایم ایف نے پاکستان کے بارے میں ایک اعلامیہ بھی جاری کیا، جس میں کہا گیا کہ قرضوں کی ادائیگی کی مینجمنٹ پر بات چیت کی گئی۔

37 ماہ کے پروگرام کے پہلے جائزے کے لیے سٹاف لیول معاہدے کی طرف پیشرفت کی گئی۔ اس کے علاوہ، پاکستان کے ساتھ قرضوں کی ادائیگی کی مینجمنٹ، توانائی کے شعبے میں لاگت کم کرنے، اور صحت عامہ کی بہتری کے لیے بھی بات چیت کی گئی۔

آئی ایم ایف کی جانب سے جاری کردہ اعلامیے میں یہ بھی کہا گیا کہ آئی ایم ایف کی ٹیم، جس کی قیادت نیتھن پورٹر کر رہے تھے، نے پاکستان کا دورہ کیا۔

آئی ایم ایف جائزہ ٹیم 24 فروری سے 14 مارچ تک اسلام آباد اور کراچی میں موجود رہی۔ آئی ایم ایف نے یہ بھی کہا کہ توانائی کے شعبے میں لاگت کم کرنے اور معاشی ترقی کی شرح بڑھانے پر بات چیت ہوئی، جبکہ صحت عامہ، تعلیم کے فروغ، اور سماجی تحفظ کے حوالے سے بھی تبادلہ خیال کیا گیا۔